رووداو دیجیتاڵ
ریال مەدرید سەرکەوتنێکی مێژوویی و گەورەی لە نێو یاریگای 'سپۆتیڤای كامپ نۆ' تۆمارکرد، پاش ئەوەی لە گەڕی دەیەمی خولی ئیسپانیا و لە یاریی لووتکەی کلاسیکۆدا، بە ئەنجامی (2-1) لە یانەی بارسێلۆنای خاوەن یاریگای بردەوە، بە سەرکردایەتیی ئەستێرە درەوشاوەکەی کیلیان ئێمباپێ.
یارییەکە، کە شەوی یەکشەممە بەڕێوەچوو، پڕ بوو لە کێبڕکێی بەهێز و گۆڕانکاری خێرا، کە تێیدا یانەی شاهانە بە باڵادەستی توانی سێ خاڵی زێڕین لە نێو دڵی نەیارە دێرینەکەی دەربهێنێت و یارییەکە بە سوودی خۆی کۆتایی پێبهێنێت.
نیوەی یەکەم بە هێرشی هاوسەنگ دەستپێکرد، تاوەکو لە خولەکی 41ـدا، شازادەی فەرەنسی کیلیان ئێمباپێ بە لێهاتوویی تۆڕی گۆڵی بارسێلۆنای هەژاند و یانەی مێرەنگی بە گۆڵێک لە پێشەوە هێشتەوە پێش کۆتاییهاتنی نیوەی یەکەمی یارییەکە.
لە نیوەی دووەمدا، کەتەلۆنییەکان بۆ گەڕانەوە هەوڵی زۆریان دا؛ ئەستێرەی بەرازیلی رافینیا لە خولەکی 61ـدا توانی ئەنجامەکە بۆ بارسێلۆنا یەکسان بکاتەوە و گەرموگوڕی بگەڕێنێتەوە بۆ نێو یاریگا.
بەڵام یارییەکە بڕیاری کۆتایی خۆی نەدابوو؛ لە کاتێکدا هەمووان چاوەڕێی کۆتاییهاتنی یارییەکە بوون بە یەکسانبوون، کیلیان ئێمباپێ لە خولەکی 88ـدا گۆڵی دووەمی خۆی و تیپەکەی تۆمارکرد و گورزێکی کوشندەی لە خاوەن یاریگا وەشاند، بەمەش سەرکەوتنی بۆ یانەی شاهانە مسۆگەر کرد.
بەم شکستە، زنجیرە سەرکەوتنە بەردەوامەکانی بارسێلۆنا لەم وەرزەدا پاش 9 سەرکەوتنی لەسەریەک وەستا، لە کاتێکدا ریال مەدرید بە سەرکردایەتیی جۆزێ مۆرینیۆی راهێنەر، کۆی خاڵەکانی بەرزکردەوە بۆ 24 خاڵ و پلەی سێیەمی ریزبەندی گرت، بە جیاوازیی تەنیا سێ خاڵ لەگەڵ بارسێلۆنای پێشەنگ، لە کاتێکدا ئاتلێتیکۆ مەدرید بە 25 خاڵ لە پلەی دووەمدایە و رکابەری لەسەر لووتکە زیاتر گەرم بووە.
