رووداو دیجیتاڵ
یانەی بایرن میونشنی ئەڵمانی بەر لە رووبەڕووبوونەوەی ئارسیناڵی ئینگلیزی لە گەڕی سێیەمی چامپیۆنزلیگ، گورزێکی دیکەی بەرکەوت.
میدیای ئەڵمانیا ئاشکرایانکردووە، بەئەگەری زۆرەوە، ڤینسینت کۆمپەنی، نەیتوانیوە لە کۆنگرەی رۆژنامەنووسیی بەر لە یارییەکە ئامادەبێت، ئەگەر هەیە بۆ یارییەکەش لەسەر هێڵ نەبێت.
بایرن لە ئالیانز ئەرێنا، لە کاژێر 22:00 بەکاتی باشووری کوردستان، میوانداریی ئارسیناڵی ئینگلیزی دەکات و چاوی لە دووەم سەرکەوتنە لە پاڵەوانێتییەکەدا، پاشئەوەی لە گەڕی پێشوودا، لەگەڵ ڤایکینگ بەسێ گۆڵ یەکسانبوو.
وەک سەرچاوەکان دەڵێن، کۆمپەنی دووچاری نەخۆشییەکی ڤایرۆسی بووە و بەهۆیەوە نەیتوانیوە لە کۆنگرە رۆژنامەنووسییەکەی بەر لە یارییەکەدا، بەشدار بێت.
بایرن میونشن، لە بڵاوکراوەیەکی فەرمیدا رایگەیاندووە، کۆمپەنی ئامۆژگاری کراوە بەوەی پشوو بدات، بەهۆی تووشبوونی بەڤایرۆسەوە، بەوەش نەیتوانیوە سەرپەرشتی دوایین مەشقی تیپەکەی بکات بەر لە یارییەکە.
کۆمپەنی لە سەرەتای هەفتەدا ئەگەرچی لەسەر کورسیی یەدەگ بوو، کاتێک تیپەکەی بە 6 - 1 گۆڵ لە لایپزیگی بردەوە، بەڵام ئەوکاتیش بەهۆی ئازاری ئەژنۆوە ناچاربوو زۆرینەی کات دابنیشێت و ئارۆن دانکسی یاریدەدەری، رێنوێنی بداتە یاریزانان.
دانکس سەرپەرشتی دوایین مەشقەکانی تیپەکە دەکات و لە کۆنگرەی رۆژنامەنووسیدا دەردەکەوێت، ئەرکێک کە پێشتریش بەهۆی سزادانی کۆمپەنییەوە، پێشتر لە ئەستۆی گرتووە.
ئەگەری بەشدارینەکردنی کۆمپەنی لە یارییەکەدا، تاکە کێشەی بایرن نابێت، بەڵکو لە تواناکانی میشێل ئۆلیسێی هێرشبەری فەرەنسیشی بێبەش دەبێت، کە بەهۆی کارتی سوورەوە، لە یارییەکەی ڤایکینگ دەرکرا و بەشداری لە یارییەکەی ئەمشەودا ناکات.
