ئێمباپێ: کارێکی مەزنمان ئەنجامدا و بیر لە رکابەری داهاتوو ناکەینەوە

رووداو دیجیتاڵ

کیلیان ئێمباپێ، ئەستێرە و گۆڵکاری هەڵبژاردەی فەرەنسا دەڵێت "گەیشتن بە قۆناخی پێشکۆتایی کارێکی مەزنە و بیر لەوە ناکەینەوە لە قۆناخی داهاتوودا بەرامبەر کێ یاریی دەکەین."

ئێمباپێ دوای بردنەوەیان لە هەڵبژاردەی مەغریب و گەیشتن بە قۆناخی پێشکۆتایی مۆندیال قسەی بۆ رۆژنامەڤانان کرد و گوتی "هەمیشە گەیشتن بە قۆناخی پێشکۆتایی کارێکی مەزنە؛ پێم وایە ئەمە وێستگەیەکی گرنگە بۆ ئێمە وەک تیپ، بۆیە زۆر دڵخۆشین کە جارێکی دیکە لە چوار گۆشەی زێڕینین. بۆ یاریزانە بە ئەزموونەکان، ئەمە سێیەمجارە."

لەبارەی ئەوەی کە بیر لە رکابەری داهاتوویان دەکەنەوە؟ کیلیان گوتی "نەخێر، هیچ رکابەرێکی دیاریکراوم لە مێشکدا نییە. من سەرنج ناخەمە سەر رکابەرەکان، تەنیا سەرنجم لەسەر ئەوەیە چۆن پشوو بدەین و چۆن خۆمان بۆ یارییەکەمان ئامادە بکەین. بێگومان تەماشای یاریی ئیسپانیا و بەلجیکا دەکەین، چونکە ئێمە بینەری هەموو یارییەکانین، بەڵام هیچ تیپێکم لە تیپێکی دیکە پێ باشتر نییە. هەرچییەک رووبدات، لە کۆتاییدا یارییەکە وەک 'تۆڵەکردنەوە' دەبێت؛ ئەگەر بەلجیکییەکان بن، بەدوای تۆڵەدا دەگەڕێن، ئەگەر ئیسپانیاش بێت، ئەوانیش بەدوای تۆڵەدا دەگەڕێن. ئەوە خەمی سەرەکی من نییە."

ئێمباپێ باس لە ئەزموونی خۆی لە مۆندیالدا دەکات و دەڵێت "من پێشتر پاڵەوانی جیهان بووم و پلەی دووەمیشم بەدەستهێناوە. بەڵام ئەم تیپە ئێستا نە پاڵەوانی جیهانە و نە پلەی دووەم، بۆیە لەم ساتەدا بەهێزترین تیپ نییە. ئەمە ئەو تیپەیە کە زۆرترین توانای شاراوەی هەیە، ئەوەیە کە بە ئاسانی دەتوانیت سەرکەوتنی تێدا ببینیت، تیپێکە خاوەنی چەندین تایبەتمەندییە. بێگومان ئەمە رێگەت پێ دەدات خەون ببینیت. بەڵام بەهێزترین؟ من هەمیشە گوتوومە بەهێزترین تیپەکان ئەوانەن کە دەبنە براوە. من لێرە نازناوەکە لە تەنیشت خۆمەوە نابینم، بۆیە تاوەکو پێچەوانەکەی نەسەلمێنرێت، ئەمە بەهێزترین تیپ نییە."

لەبارەی ئاستی تیپەکەوە گۆڵکاری مۆندیال بە رۆژنامەڤانانی گوت "بێگومان هەستێکی باشم هەیە. ئەمە تیپ و گروپێکە کە زۆر خۆشمدەوێن. زۆر لە یاریزانانی ئەم تیپە هاوڕێی منن و ساڵانێکی زۆرە دەیانناسم. هەروەها یاریزانە گەنجەکانیشمان هەن کە کەمێک وەک یاریزانێکی دێرین سەیری من دەکەن. دەبێت ببمە نموونە بۆ تیپەکە، بەتایبەتی لە رووی دەروونی و سۆزدارییەوە. لە ناو یاریگادا، ئەوان یاریزانن و دەزانن چۆن یاری بکەن، بەڵام لە رووی سۆزدارییەوە، چونکە من ئەو یاریزانەم کە زۆرترین یاری مۆندیالم بۆ تیپەکە ئەنجامداوە و دەزانم یاریکردن لە مۆندیال چۆنە، پێویستە ئەوە بۆ هاوڕێکانم بگوازمەوە."

کیلیان ئێمباپێ زیاتر لەبارەی ئاستی فەرەنساوە قسەیکرد و گوتی "ئێمە ئاگاداری تواناکانی ئەم تیپەین. بەڵام پێم وایە لەم ئاستەدا، بابەتەکە تەنیا توانا نییە، بەڵکو پەیوەندی بەوەوە هەیە کە لە پاڵەوانێتییەکەدا چی بەدەست دەهێنین. وێڕای ئەوەش، ترس و دڵەڕاوکێ گۆڵ تۆمار ناکەن و یاری نابەنەوە. ئەوە تەنیا هەستێکە، بێگومان، بەڵام هەستەکان یاریت بۆ نابەنەوە. بێگومان کاتێک دەچیتە ناو یاریگا متمانەت پێ دەبەخشێت، بەڵام کاتێک چوویتە ناو یاریگا، دەبێت خۆت بسەلمێنیت. ئێمە هێشتا زۆر شتمان ماوە بیسەلمێنین ئەگەر بمانەوێت وەک تیپێکی شکست نەناس بناسرێین یان شایەنی ئەو هەموو ستایشانە بین کە باس دەکرێن."

کیلیان ئێمباپێ لە شەش یاریی مۆندیالی 2026 هەشت گۆڵی تۆمارکردووە، لەگەڵ لیۆنێل مێسی رکابەری لەسەر پێشەنگی گۆڵکارانی مۆندیال دەکەن.