رووداو دیجیتاڵ
هەڵبژاردەی ئینگلتەرا سێیەم یاریی خۆی لە مۆندیالدا ئەنجامدەدات و دەیەوێت پارێزگاری لە پێشەنگی ریزبەندی کۆمەڵەی دوازدەیەم بکات.
ئینگلتەرا بەرامبەر پەنەما یاریی دەکات، یارییەکە لە مێتلایف لە نیو جێرسی بەڕێوەدەچێت، هەڵبژاردەکە دەیەوێت بردنەوەیەکی دیکە تۆماربکات و پارێزگاری لە پلەی یەکەمی ریزبەند بکات.
سێ شێرەکان لە پلەی یەکەمی ریزبەندی کۆمەڵەکەن، بردنەوەیەک و یەکسانبوونێکیان هەیە، تیپەکە بەبردنەوە و یەکسانبوون لە پلەی یەکەم دەمێنێتەوە و لە قۆناخی داهاتوودا بەرامبەر تیپێکی خاوەنی پلەی سێیەم یاریی دەکات.
هەڵبژاردەی پەنەما هەردوو یاریی رابردووی دۆڕاندووە و ماڵئاوایی لە مۆندیال کردووە.
ریس جەیمس، بەرگریکاری هەڵبژاردەی ئینگلتەرا تووشی پێکانبووە و بەشداری لە یارییەکەدا ناکات، لەکاتێکدا لە دوو یاریی رابردوودا بەشێوەی سەرەکی یارییکردووە.
تۆماس توخێل، راهێنەری هەڵبژاردەی ئینگلتەرا لەبارەی پێکانی ئەو یاریزانەوە گوتی "ریس جەیمس کێشەیەکی سووکی لە ماسولکەی پشتەوەی رانیدا هەیە، پێکانێکی سووکە؛ لە دوو رۆژی رابردوودا نەیتوانیوە مەشق بکات. ئەو ئێستا لە پڕۆگرامێکی خێرای چاکبوونەوەدایە و یاری بە یاری هەڵسەنگاندنی بۆ دەکەین. بەڵام متمانەیەکی زۆرمان هەیە کە لەم پاڵەوانێتییەدا جارێکی دیکە بەردەست دەبێتەوە."
تۆماس باس لە شێوازی یارییکردنیان دەکات و دەڵێت "سەبارەت بە شێوازی بیرکردنەوەمان، ئێمە تریڤۆ چاڵۆبامان بانگهێشت کرد بۆ ئەوەی جاریل کونسا ئازاد بکەین بۆ ئەوەی لە پۆستی بەرگریکاری باڵی راست یاری بکات. هەروەها لە هێڵی بەرگری سێ کەسیدا یاریی کردووە کە زۆر دوور نییە لەو پۆستەی لە لیڤەرکوزن هەیبوو. دڵخۆشم. من تیپەکەم هەڵبژاردووە، بۆیە ئێمە بە تایبەتمەندییەکانی یاریزانەکان و ئەو هێزەی پێمان دەبەخشن دڵخۆشین. هەریەکە لە ئێلیۆت ئەندەرسۆن و دێکلان رایس بە تەواوی بەشدارییان لە مەشقەکاندا کرد. ئەوان دوای یارییەکە کێشەی بچووکیان هەبوو، بەڵام کاتی پێویستیان هەبوو بۆ چاکبوونەوە، بۆیە جگە لە ریس جەیمس هەمووان بەردەستن و ئامادەن بۆ یاریکردن. ئەمشەویش بڕیاری کۆتایی دەدەین."
