رووداو دیجیتاڵ
جۆزێپ پێدرێرۆڵ، راگەیاندکاری بەناوبانگی ئیسپانی، سوپرایزێکی گەورەی سەبارەت بە داهاتووی جولیان ئەلڤارێزی ئەرجەنتینی تەقاندەوە.
پێدرێرۆڵ نامەیەکی ئاشکرا کرد کە لە ناوەوەی یانەی ریال مەدریدەوە پێی گەیشتووە، کە تێیدا جەخت لە متمانەی یانە شاهانەکە کراوەتەوە بۆ یەکلاکردنەوەی یەکێک لە پڕبەرباس و مشتومڕترین گرێبەستەکانی تۆپی پێی ئیسپانیا.
پێدرێرۆڵ لە لێدوانێکدا کە هەژماری فەرمی بەرنامەی ئێل چێرینگیتۆ لەسەر پلاتفۆرمی 'ئێکس' بڵاویکردووەتەوە، رایگەیاند کە سەرچاوەکانی ناو ریال مەدرید راستەوخۆ پێیانگوتووە "ئاتلێتیکۆ مەدرید جولیان ئەلڤارێزمان پێ دەفرۆشێت".
ئەم لێدوانانە لەکاتێکدا دێن کە پێشتر بارسێلۆنا وەک پاڵێوراوی سەرەکی بۆ گواستنەوەی هێرشبەرەکەی ئاتلێتیکۆ مەدرید دادەنرا، بەتایبەت دوای چەندین راپۆرت کە باسیان لە ئارەزووی یاریزانەکە دەکرد بۆ پەیوەندیکردن بە یانە کەتەلۆنییەکەوە. تەنانەت کار گەیشتە ئەوەی ئاتلێتیکۆ مەدرید هەڕەشەی تۆمارکردنی سکاڵا لە یەکێتیی تۆپی پێی جیهانی FIFA دژی بارسێلۆنا بکات، بەهۆی دەنگۆی ئەنجامدانی گفتوگۆ لەگەڵ یاریزانەکە لەکاتێکدا کە گرێبەستی لەگەڵ یانە مەدریدییەکەدا هەبووە.
سوپرایزەکە لێرەدا گەورەتر دەبێت، چونکە ئاتلێتیکۆ مەدرید لە هەفتەکانی رابردوودا دەستەوارەیەکی فەرمی ریال مەدریدی بەبڕی 150ملیۆن یۆرۆ رەتکردبووەوە، و پێداگیری لەسەر مەرجی هەڵوەشاندنەوەی گرێبەستەکەی دەکرد کە بڕەکەی 500 ملیۆن یۆرۆیە.
دۆسێیەی ئەلڤارێز لە رۆژانی دواییدا بووەتە یەکێک لە گەرمترین بابەتەکانی بازاڕی گواستنەوە. ئێستا ئەو پرسیارەی ئیسپانیای بەخۆیەوە سەرقاڵ کردووە ئەوەیە: ئایا بارسێلۆنا دەتوانێت ئەو یاریزانە بڕفێنێت کە زۆر کەس بە جێگرەوەی گونجاوی هێڵی هێرشبەری دەبینن، یان ریال مەدرید هەندێک زانیاری و نهێنی لایە کە گرێبەستەکە بۆ بەرژەوەندی خۆی کۆتایی پێ دەهێنێت؟.
