رووداو دیجیتاڵ
گراهام ئارنۆڵد، راهێنەری هەڵبژاردەی عێراق دەڵێت "بەرامبەر فەرەنسا یارییەکی باشمان کرد، بەڵام دۆڕان، ئێستا پێویستە تەنیا بیر لە یاریی سەنیگال بکەینەوە".
راهێنەری عێراق لە دوای یارییەکەیان بەرامبەر فەرەنسا و دۆڕانیان بە سێ گۆڵی بێبەرامبەر لە کۆنگرەی رۆژنامەڤانیدا لەبارەی ماوەی زۆری پشووی نێوان گێمی یەکەم و دووەم گوتی "پێموایە ئەمە یەکەمجارە لە تۆپی پێدا ئەزموونی شتێکی وا بکەم، چ وەک راهێنەر یان وەک یاریزان. وەستانی یارییەکە بۆ ماوەی دوو کاژێر، بێگومان کارەکەی بۆ یاریزانەکان زۆر قورستر کرد. بۆیە، هەموو شتەکە پەیوەست بوو بەوەی وەک لە نێوان هەردوو گێمەکەدا و پێش ئەوەی بگەڕێنەوە بۆ ناو یاریگا بە یاریزانەکانم گوت کێ دەتوانێت لە رووی دەروونییەوە خۆی ئامادە بکاتەوە. بێگومان، هەندێک لە هەڵەکانمان لەوانەیە پەیوەندییان بەو پشووە درێژەی دوو کاژێرییەی بەهۆی زریانەکەوە دروست بوو هەبێت. بەڵام، دەبێت سەیری لایەنە ئەرێنییەکان بکەیت. لایەنە ئەرێنییەکان بێگومان یاریکردنە بەرامبەر تیپی یەکەم یان دووەمی جیهان؛ تیپێکی ناوازە و یاریزانی ناوازە. وەک دەبینن، ئێمە لە رووی خاوەندارێتی تۆپەوە لەوان باشتر بووین."
راهێنەرەکە دەڵێت "پلانەکەشمان هەر ئەوە بوو کە تۆپەکە لای خۆمان بهێڵینەوە، چونکە هەستم دەکرد ئەوان تیپێکی ئەوتۆ نین کە گوشاری بەهێز بکەن. بۆیە، باش بوو کە بەو شێوەیەی ویستمان تۆپەکەمان لای خۆمان هێشتەوە."
گراهام لە بەشێکی دیکەی قسەکانیدا لەبارەی ئەوەی هەلی گەیشتنیان بە قۆناخی داهاتوو ماوە گوتی "تەنیا شتە بێزارکەرەکە ئەوەیە کە چۆن بەرامبەر نەرویج یاریمان کرد و هەڵەیەک زیانی پێ گەیاندین، ئەمڕۆش هەستم دەکرد راستەوخۆ دوای گێمی یەکەم بە باشی لە ناو یارییەکەدا بووین، بەڵام هەڵەیەکی دیکە زیانی پێ گەیاندین. بۆیە، بۆ من ئێستا هەموو شتێک پەیوەستە بە یارییەکەی سەنیگالەوە."
ئارنۆڵد دەڵێت "ئێمە لێرەین و بەهۆی زیادکردنی ژمارەی تیپەکانەوە، هەشت تیپی پلەی سێیەم سەردەکەون بۆ قۆناخی داهاتوو، بۆیە هێشتا هەلمان ماوە. دەبێت بە خێرایی ئەم یارییە تێپەڕێنین. کاتێک دەڵێم هەلمان ماوە، مەبەستم ئەوەیە دەبێت بچینە ناو یارییەکەی سەنیگال و لێیان ببەینەوە، ئەوکات دەرفەتی ئەوەمان دەبێت یەکێک لەو هەشت کورسییە بەدەستبهێنین."
هەڵبژاردەی عێراق لە دوو یاریی بەدوای یەکدا دۆڕاوە، لە دوو یارییدا 7 گۆڵی لێکراوە و تەنیا یەک گۆڵی تۆمارکردووە.
