Hewlêr (Rûdaw) – Helbestvanê Kurd Îlhan Samî Çomak piştî 30 sal 3 meh 6 rojan hat berdan.
Îlhan Samî Çomak ji Rûdawê re got, "Min dixwest bi roj werim berdan. Ez ji tariya çêkirî derbasî tariya rastî bûm."
Dadgehê îro biryara berdana Îlhan Samî Çomak qebûl kir.
Malbat û hezkiriyên wî li Girtîgeha Sîlîvriyê bi germî pêşwazî li Îlhan Samî Çomak kir.
Helbestvanê Kurd Îlhan Samî Çomak ji Rûdawê re got:
“Ez pir bextewar im, pir domiya. Ji xwe neheqiyeke mezin li hemberî min hatibû kirin.
Ez niha hestyar im jî, min malbata xwe û hezkiriyên xwe dîtin.
Wekî min niha gelek hevalên me di girtîgehê de ne.
Bi neheqiyeke mezin ceza dane gelek kesan.
Daxwaza min ew e ku di van rojên nêzîk de ew jî derkevin.”
Îlhan Samî Çomak her wiha anî ziman:
“Bi rastî, ji bo dîtina çirûska di çavên hezkiriyên xwe de min dixwest bi roj werim berdan.
Ez ji tariya çêkirî derbasî tariya rastî bûm.
Aliyekî min xemgîn e, min gelek hevalên hêja li pey xwe hiştin.”
Helbestvan Îlhan Samî Çomakê ku sala 1994an dema xwendekarê zanîngehê bû tevî ku delîl nehatin dîtin hatibû girtin, bi biryara dadgehê hat berdan.
Berdana Çomakê zêdetirî 30 salan e di girtîgehê de ye 21ê Tebaxa 2024an ji aliyê Komîsyona Çavdêriyê ya Îdarî ya Girtîgehê ve hatibû astengkirin.
Îlhan Samî Çomak hat berdan
— RudawKurdi (@RudawKurdi) November 26, 2024
Helbestvan Îlhan Samî Çomak:
🎙️ ❝Gelek hevalên min di girtîgehê de ne❞
🎙️ ❝Ez dixwazim girtiyên din jî werin berdan❞
🎙️ ❝Ez gelekî bextewar im❞ pic.twitter.com/6XqHXm7Fkl
Îlhan Samî Çomak kî ye?
Îlhan Samî Çomak sala 1973yan li navçeya Kanîreşê ya Çewlîgê ya Bakurê Kurdistanê ji dayik bûye.
Çomak sala 1994an di 21 saliya xwe de, dema xwendekariya xwe ya li Zanîngehê Stenbolê ya Beşa Cografyayê bi hinceta “endamtiya rêxistinê”, tevî ku ti delîlên şênber tunebûn jî hatibû girtin.
Bi rojan şkence lê hat kirin û li Dadgeha Ewlehiyê ya Dewletê (DGM) hat darizandin û cezayê îdamê lê hat birîn. Dema cezayê îdamê hat rakirin, cezayê bû heta hetayê.
Piştî biryara erêkirinê ya Dadgeha Bilind, Çomak serî li Dadgeha Mafên Mirovan a Ewropayê (DMME) dabû û dadgehê biryar dabû ku Çomak “bi rengekî adilane nehatiye darizandin”.
Çomak sala 2013an careke din hatibû darizandin lê dadgehê heman ceza lê birîbû.
Ji ber ku dema desteserkirinê di bin şkenceyê de zabitnameyên derbarê wî de hatibûn nivîsandin DMMEyê biryar dabû ku careke din were darizandin.
Cara duyem darizandin Çomak sala 2013an dest pê kiribû û hemû daxwazên ku di dema darizandinê de biryara tehliyeyê derkeve nehatibûn qebûlkirin.
Dadgeha Destûrê jî 28ê Çiriya Pêşîn a 2015an biryara tehliyeya Çomak red kiribû.
Biryara cezayê heta hetayê ya ku Dadgeha 4emîn Cezayê Giran a Stenbolê ji bo Îlhan Çomak dabû ji hêla 16emîn Daîreya Cezayan a Dadgeha Bilind ve hat erêkirin.
Helbestên wî li zimanên Almanî, Arnawidî, Fransî, Îngilîzî, Galî, Hindî, Îtalî, Makedonî, Norwecî, Rûsî û Yunanî hatine wergerandin.
Çomak, endamê rûmetê yên PENên Awistirya, Galler, Îrlanda, Kurdistan, Norwec û Tirkiyeyê ye.
Bijarteyek ji helbestên wî sala 2022yan bi navê Seperated From the Sun li Brîtanyayê hat çapkirin.
Çomak li girtîgehê heta niha çend pirtûkên helbestan nivîsandine.
Wî herî dawî payîza 2023yan pirtûka xwe ya yekem a helbestan a bi Kurdî “Çiyayê Girtî” ji Weşanxaneya Darayê derxist.
