Hewlêr (Rûdaw) – Koçberên Sûriyeyî ji Urdinê vedigerin welatê xwe.
Barhilgir zêdeyî 700 koçberên Sûriyeyî ji Deriyê Sînorî yê Cabir-Nesîbê vediguhêzin nav axa welatê wan.
Endama Saziya Ferehê ya Vegera Koçberan Îlham Mutî anî ziman:
“Nêzîkî 9 rojan dibe ev kampanya didome, spas ji Xwedê re zêdeyî 2 hezar kes vegeriyane.
Tenê di demeke zêde kurt de zêdetirî 2 hezar kesî bi dilê xwe vegeriyane welatê xwe.
Me li wê derê jî cihê pêşwazîkirinê ji wan re dabîn kiriye, tîmên şahiyan dê pêşwaziyê li wan bikin.”
Piraniya koçberên vegeriyayî yên Kampa Zateriyê ne, li gorî Neteweyên Yekbûyî wekî duyemîn mezintirîn kampa koçberan li cîhanê tê hesabkirin ku nêzîkî 85 hezar koçber lê dijîn.
Koçberê vegeriyayî Mihemed Mesalime got:
“Ez niştecihê Kampa Zateriyê me, ev 13 sal in li vê derê me.
Niha vedigerim Sûriyeyê, piştî ketina rejîmê birayên min vegeriyan, dibêjin rewş baş bûye û şîreta vegerê li me dikin, em ê jî vegerin û li gel wan dilxweş bibin.”
Li gorî amarên fermî yên Urdinê ji dema ketina rejîma Beşar Esed û heta niha zêdeyî 65 hezar koçberên Sûriyeyî vegeriyane welatê xwe.
Roj bi roj hejmara koçberên vegeriyayî zêdetir dibe.
Li gorî Hikûmeta Urdinê berî ketina rejîma Beşar Esed nêzîkî milyonek û 300 hezar koçberên Sûriyeyî li ba wan tomarkirî bûn.
_(1).webp&w=3840&q=75)
.webp&w=3840&q=75)
