Hewlêr (Rûdaw) - Siyasetmedarê Kurd Altan Tan bal kişand ser rûdanên dawî yên di pêvajoya nû de ragihand û got, “Me dikarîbû bi Erdogan re bazarê bikin lê 12 sal vala çûn.”
Parlamenterê berê yê HDPyê û siyasetmedarê Kurd Altan Tan bû mêhvana Bultena Bakur û pirsên Hêvîdar Zanayê yên derbarê “pêvajoya nû” bersivandin.
“Tişta herî girîng danîna çekan e”
Altan Tan diyar kir ku di vê pêvajoya nû de tişta herî girîng danîna çekan e.
Bi gotina Altan Tan Kurd dikarin gav bi gav tiştan bistînin û bi ser bikevin.
Tan amaje bi wê kir ku pêwîst nake hemû daxwazên Kurdan bi carekê bên dabînkirin.
Siyasetmedarê Kurd tekez kir ku dûrketina ji tundiyê Kurd dikarin hêsantir mafên xwe wergirin.
“Muxalfet îdîa dike ku tişta didome tenê bazar e”
Altan Tan destnîşan kir ku muxalfet îdîa dike ku tişta didome tenê bazar e.
Siyasetmedarê Kurd bîr anî ku berî 12 salan hevserokê wê demê yê HDPyê Selahattîn Demîrtaş gotiye “Em dê nehêlin Erdogan bibe serok” û got:
“Lê Demîrtaş niha dibêje bila Xwedê emre Bahçelî û Erdogan dirêj bike.
Me dikarîbû bi Erdogan re bazarê bikin lê 12 sal vala çûn. Di nava Kurdan de siyasetmedarên Kurdan ên jêhatî kêm in. Kes xêra xwe tiştan nade Kurdan.”
“Divê DEM Partî xwe ji nû ve ava bike”
Tan her wiha destnîşan kir ku divê DEM Partî xwe ji nû ve ava bike û ragihand ku dem bi ser fikir û îdyolojiya wê derbas bûye.
Li gorî Altan Tan, Kurd dê li Rojhilata Navîn bibin beşeke guherînan, lê divê Kurd pişta xwe nedin Îsraîl, Amerîka, Îran, Almanya û Brîtanyayê.
Tan tekezî li ser wê yekê jî kir ku "Kurd nikarin Derêzor û Reqayê bi rê ve bibin ji ber ku xelkê wan deran piranî Ereb in."
Altan Tan di dawiyê de got, "Divê hikûmet nermtir û samîmîtir be."
Siyasetmedar Altan Tan:
— RudawKurdi (@RudawKurdi) March 5, 2025
🎙️ ❝Tişta herî girîng danîna çekan e❞
🎙️ ❝Em dikarin gav bi gav tiştan bistînin, bi ser bikevin❞
🎙️ ❝Demîrtaş digot, em Erdogan nakin serok lê niha dibêje, Xweda emirê Erdogan, Bahçelî û Ocalan dirêj bike❞
🎙️ ❝Me dikarîbû bi Erdogan re bazarê… pic.twitter.com/GZfoV5DHuY
