Li Rojavayê Kurdistanê Ereb û Siryanan jî Newroz pîroz kir
Hewlêr (Rûdaw) - Li Rojavayê Kurdistanê pêkhateyên Ereb û Siryan jî beşdarî çalakiyên Newrozê bûn.
Her du pêkhateyan li saziyên Rêveberiya Xweser jî Newroz pîroz kir.
Hevseroka Encûmena Gelan a Rêveberiya Xweser Sîham Qiryoyê got:
“Cejna Newrozê cejna azadî, nûbûn û vejandinê ye. Bi vê helkeftê em pîrozbahiyê li hemû gelên herêmê û bi taybetî gelê Kurd dikin.”
Li stadyuma bajarê Reqayê ku di dema DAIŞê zindan bû, ji aliyê pêkhateyên Kurd, Ereb û Siryan ve ji bo şahî û çalakiyên Cejna Newrozê hat xemilandin.
“Em daxwaza lihevkirinê dikin”
Cîgirê Hevserokatiya Encûmena Cîbicîkar a Rêveberiya Xweser Hemdan El-Ebid jî anî ziman:
“Îro roja azadiyê ye, roja kerametê ye, roja aştiyê ye û roja hezkirinê ye.
Em li bakur û rojhilatê Sûriyeyê di vê rojê de û bi baweriyeke mezin dibêjin em xwazyarên aştiyê ne, ne xwazyarên şer û kuştinê ne, em xwazyarên hezkirinê ne û ne xwazyarên zikreşiyê ne, em xwazyarên avakirinê ne û ne xwazyarên wêrankariyê ne.
Em daxwaza lihevkirinê dikin, em dibêjin Cejna Newrozê li we û li hemû gelên cîhanê pîroz be.”
Li Sûriye û Rojavayê Kurdistanê berî 2011ê Newroz ji aliyê Hikûmeta Sûriyeyê ve hatibû qedexekirin.
Gelê Kurd û aliyên siyasî li dijî qedexekirinê li çol, gund û ser giran Newrozê pîroz dikirin.
Lewma Newroz bi xebata rizgarîxwaziyê û Kurdayetiyê ve hatibû girêdan.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse