Hewlêr (Rûdaw) - Navenda Ragihandinê ya Hêzên Sûriyeya Demokratîk (HSD) ragihand ku ewlehiya Dêrezorê ji bo wan xeta sor e.
Hêzên Sûriyeya Demokratîk (HSD) diyar kir ku bermahiyên rejîma Beasê êrişî bajarokên Zîban û Teyanê yên Dêrezorê kiriye.
Di daxuyaniyê de hat gotin ku şaneyên ji bermahiyên rejîma Beasê ya berê û milîsên Dîfa El Weteniyê li Zîban û Teyanê kiryarên xwe yên talankirinê domandin.
Li gorî daxuyaniyê, milîsan rêya sereke girtiye û êrişî baregehên ewlehî û saziyên xizmetguzariyê kiriye.
“Armanca êrişan pêkanîna bêîstiqrariyê ye”
HSDyê diyar kir ku ew dê bi biryardarî li hemberî êrişan rawestin û got:
“Armanca êrişan ew e ku derbe li jiyana welatiyan bidin û li herêmê alozî û bêîstiqrariyê pêk bînin.
Hêzên Meclisa Leşkerî ya Dêrezorê dê bi hemû hêza xwe li hemberî wan hewldanan tev bigere.”
HSDyê daxuyand ku hêzên wan û hêzên Koalîsyona Navneteweyî dê xebatên xwe yên hevbeş bidomînin û derfetê nedin şaneyên DAIŞê liv û tevgerê bikin.
“Ewlehiya Dêrezorê xeta sor e”
Hêzên Sûriyeya Demokratîk (HSD) silav li hevkarî û hişyariya xelkê kir û destnîşan kir:
“Ewlehiya Dêrezorê xeta sor e û em dê bi ser her kesî bigirin ku hewl bide zererê bigihîne herêmê.”
Angaştên pevçûnên bi Tehrîr El Şamê re
Li rexê din, hatibû angaştkirin ku li Dêrezorê di navbera HSD û Tehrîr El Şamê de pevçûn çêbûne.
HSDyê ev angaşt red kirin û got:
“Em ji destpêka guherînên dawî yên li Sûriyeyê kanalên pêwendiyê yên bi Şamê re diparêzin.
Me kariye aramiyê li hemû herêman dabîn bikin û diyaloga erênî jî berdewam dike."
.webp&w=3840&q=75)
