Hewlêr (Rûdaw) - Li navçeya Wêranşarê ser bi parêzgeha Rihayê ya Bakurê Kurdistanê, 4 cotkarên ji ber nebûna elektrîkê xwepêşandan kiribûn û rê girtibûn bi biryara dadgehê hatin girtin.
Li Wêranşarê roja 15ê Tîrmehê cotkarên gundên Golkûrk û derdora wê ji ber nebûna elektrîkê li ser rêya Riha-Mêrdîn û rêya Wêranşar-Siwêregê xwepêşandan kiribûn û rê girtibûn.
Hêzên cendirme bi tundî êrîşî cotkaran kiribûn û 12 cotkar desteser kiribûn. 12 cotkar piştî karên îfade wergirtinê li Fermandariya Cendirmeyan a Wêranşarê, roja 16ê Tîrmehê bo Dadgeha Wêranşarê hatin şandin.
Dadgehê 8 cotkar berdan û derbarê cotkarên bi navê Abdulkadir Yildizogullari, Mehmet Yildizogullari, Îsmail Akyol û Zafer Keskinbiçakli de biryara girtinê da. Her çar cotkar bo Girtîgeha Curnereşê hatin şandin.
Cotkarê bi navê Abdulkadir Yildizogullari ku pismamê wî hatine girtin ji Rûdawê re got: “7-8 roj in elektrîka me tineye. Elektrîka 12 gundan tineye. Ava me ya vexwarinê nîne. Me got ji bo ava vexwarinê rojê 2 demjimêran elektrîka me berdin, dîsa jî bernedan. Erdên me hemû hişk bûn û şirîkên me yên li ser erdan hemûyan bar kirin. Nexweşên me hene ku pêwîstiya wan bi elektrîkê heye. Amûrên dermankirinê bi elektrîkê dixebitin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse