Hewlêr (Rûdaw) - Serokê Partiya DEVAyê Alî Babacan diçe parêzgeha Amedê ya Bakurê Kurdistanê û bi berbijêrên partiya xwe yên wê parêzgehê re dicive.
Serokê Partiya Demokrasî û Pêşveçûnê (DEVA) Alî Babacan di çarçoveya xebatên hilbijartinên xwecihî yên 31ê Adara 2024an de, îro diçe Amedê.
Biryar e Babacan demjimêr 10:00an li oteleke Amedê li gel berbijêrê partiya xwe yê Şaredariya Bajarê Mezin a Amedê Prof. Dr. Cenap Ekinci û berbijêrên navçeyan û serokê rêxistina partiya xwe yê Amedê bicive û piştre daxuyaniyekê bide çapemeniyê.
Alî Babacan piştî civînê dê esnaf û dikandarên Amedê ziyaret bike û dê nimêja inê jî li Mizgefta Mezin a Amedê bike.
Serokê DEVAyê piştre jî dê here navçeya Erxeniyê ya Amedê.
"Tirsa Alî Babacan li Amedê hinek kes lerizandine"
Berbijêrê Şaredariya Bajarê Mezin a Amedê Prof. Dr. Cenap Ekîncî berî serdana Alî Babacan li ser hesabê xwe yê medyaya civakî ragihandibû li Amedê afîş û posterên partiya wan ji aliyê hinek kesên nenas ve ji ser bîlboardên bajêr hatine rakirin û gotibû:
“Tirsa Alî Babacan li Amedê hinek kes lerizandine lê ti sûda tirsê ji bo mirinê nîne û dê DEVA were."
