Hewlêr (Rûdaw) - Helbesta “Dengên Kurdistanê” ya Hevserokê berê yê HDPyê Selahattîn Demîrtaş wekî stran ji aliyê hunermendên navdar ên Kurd ve hat stran.
Demîrtaş di helbesta xwe de banga yekîtiyê li Kurdên çar parçeyên Kurdistanê dike û dibêje:
“Yekitîyê pêk bînin, derd û keserê min bes, Li her çar aliyan rabin, bes e zindan û qefes.”
Hevserokê berê yê HDPyê Selahattîn Demîrtaş ku ji sala 2016an ve di girtîgehê de ye helbesteke Kurdî ya bi navê “Dengên Kurdistanê” nivîsî.
Hunermend Diyar Dêrsim awaz ji helbesta wî re danî û piştre wekî stran ji aliyê hunermendên Kurd ên ji çar parçeyên Kurdistanê Nasir Rezazî, Diyar Dêrsim, Hozan Comerd, Şehrîbana Kurdî, Dengbêj Kazo, Denîz Deman, Narîn Feqe, Kîjan Xeyat, Elind û bi giştî derdora 50 hunermendan ve hat stran.
Roja şemiyê klîpa stranê li ser Youtubeyê hat belavkirin.
Demîrtaş di beşeke helbesta xwe de daxwaza yekîtiyê li hemû Kurdan dike û dibêje:
“Yekîtiyê pêk bînin, derd û keserê min bes, li her çar aliyan rabin, bes e zindan û qefes.
Bibêjin em azad in, derd û kesêrê min bes.”
Her wiha amaje bi çend bajarên Kurdistanê û jî dike û dibêje:
“Ax û avên pîroz in, gul di nav da dirazin. Amed û Hewlêr nêz in, delala min Kurdistan.”
Derhêneriya klîpa bi navê “Dengên Kurdistanê” ku gotinên wê ji pênûsa Demîrtaş in ji aliyê muzîkjenê navdar ê cîhanî Grzech Piotrowski û orkestraya wî ve hat çêkirin.
Notayên muzîka stranê jî ji aliyê muzîkolog Mustafa Demîr ve hatine amadekirin.
Gotinên stranê wiha ne:
“Dema kû min tu nas kir, welatê kambax û bê kes
Hiş û aqil xelas kir, derd û keserê min bes
Dengê te bahoz rakir, Welatê bêhn û nefes
Gelê min tu hembez kir, Derd û keserê min bes
Ax û avên pîroz in, gul di nav da dirazin
Erdêxan û Efrîn nêz in, delala min Kurdistan
Çiyayê te serfiraz in, gul li derdor dilêzin
Wan û Mahabad nêz in, welatê min Kurdistan
Çerx û semah digerînin, welatê eşq û hewes
Yekîtiyê pêk bînin, derd û keserê min bes
Li her çar aliyan rabin, bes e zindan û qefes
Bibêjin em azad in, derd û kesêrê min bes
Ax û avên pîroz in, gul di nav da dirazin
Amed û Hewlêr nêz in, delala min Kurdistan
Çiyayê te serfiraz in, gul li derdor dilêzin
Dêrsim û Sine nêz in, welatê min Kurdistan”
Hevserokê berê yê HDPyê Selahattîn Demîrtaş bi hinceta “endamtî û propagandaya rêxistinê” di çarçoveya Doza Kobaniyê de ji sala 2016an ve li Girtîgeha Edîrneyê girtî ye.
22emîn Dadgeha Cezayên Giran a Enqereyê 16ê Gulana 2024an di rûniştina 83emîn a Doza Kobaniyê de Selahattîn Demîrtaş bi 42 sal cezayê girtîgehê ceza kiribû.
Hunermend Diyar Dêrsim helbesta ❝Dengên Kurdistanê❞ ya Selahattîn Demîrtaş kir stran
— RudawKurdi (@RudawKurdi) December 8, 2024
Demîrtaş di helbesta xwe de banga yekîtiyê li Kurdên çar parçeyên Kurdistanê dike û dibêje:
❝Yekitîyê pêk bînin, derd û keserê min bes, li her çar aliyan rabin, bes e zindan û qefes❞ pic.twitter.com/SeSYVCmz7B