Hewlêr (Rûdaw) - Serokê Ukraynayê di peyameke vîdeoyî ya Christmasê de, bi awayekî nerasterast amaje bi wê yekê dike ku ew mirina Putin dixwaze û dibêje, "Xewneke me hemûyan heye û dibe ku em di dilê xwe de bibêjin 'Xwedê wî tune bike'."
Serokê Ukraynayê Volodymyr Zelenskyy di peyama ku şeva Christmasê li ser tora civakî ya Xê belav kir de got:
"Tevî ew qas êşên ku anîne jî Rûsya nikare tiştê herî girîng dagir bike an bombebaran bike, ew jî dilê Ukrayniyan û baweriya me ya bi hev e."
Zelenskyy bal kişand ser Serokê Rûsyayê Vladimir Putin û got:
"Îro xewneke me hemûyan a hevpar heye; em ji bo hemûyan daxwazekê dikin.
Dibe ku her yek ji me di dilê xwe de bibêje, 'Xwedê wî tune bike'.
Lê dema ku em berê xwe didin Xwedê, bê guman em tiştekî mezintir dixwazin, em ji bo Ukraynayê aştiyê dixwazin, em ji bo vê şer dikin û em heq dikin."
Ev gotinên Zelenskyy di demekê de ne ku şeva Christmasê Rûsyayê êrişî gelek herêmên Ukraynayê, bi taybetî Odesa û Xarkivê kir û di encamê de herî kêm 5 kes hatin kuştin û karebaya gelek deveran qut bû.
Zelenskyy li ser mijarê anî ziman:
"Di şeva Christmasê de Rûsan careke din nîşan da ku ew di rastiyê de kî ne, bi sedan dronên Şahid û mûşekên Kînjalê em bombebaran kirin."
Li aliyê din Berdevkê Kremlînê Dmitry Peskov da zanîn ku Putin peyama pîrozbahiya Christmasê ji Serokê Amerîkayê Donald Trump re şandiye.
Ev yek piştî wê yekê tê ku dan û standinkarên Amerîkayê bi cuda bi Ukrayna û Rûsyayê re axivîn.
Meha borî, Trump planek ji bo bidawîanîna şer pêşkêş kiribû, her çi qas di destpêkê de wekî planeke di berjewendiya Moskowê de dihat dîtin jî Ukrayna û hevpeymanên wê yên Ewropî hewl didin planê nêzîkî helwesta Kîevê bikin.
Zelenskyy derbarê çareseriyên pêşniyarkirî ragihand ku ew amade ye hêzên xwe ji herêmên pîşesazî yên rojhilatê Ukraynayê vekişîne, bi şertê ku Moskow jî hêzên xwe vekişîne û herêm bibe "herêmeke bêçek" û ji aliyê hêzên navneteweyî ve were çavdêrîkirin.
Amerîkayê pêşniyara avakirina "herêmeke aborî ya azad" kir lê Zelenskyy israr dike ku divê her rêkeftinek pêşî bi referandûma Ukrayniyan were pesendkirin.
Li qada şer, Şaredarê Moskowê Sergey Sobyanin ragihand ku sîstema parastina asmanî ya Rûsyayê 25 dronên Ukraynayê xistine xwarê ku ber bi Moskowê ve diçûn.
Artêşa Ukraynayê jî ragihand ku dronên wan kargehek li herêma Tulayê ya li başûrê Moskowê û depoyeke dronên deryayî li Kirimê kirine armanc, her wiha parzûngeheke petrolê ya li herêma Rostovê ya Rûsyayê bi mûşeka "Storm Shadow" hatiye lêdan.
