Hewlêr (Rûdaw) - Balyozê Amerîkayê yê Enqereyê Tom Barrack şertê vegera Tirkiyeyê ya bernameya balafirên şer ên F-35an eşkere kir û got, "Divê êdî sîstema parastina asmanî ya S-400 di destê Tirkiyeyê de nebe."
Mijara bernameya F-35an ku Tirkiye salên berê ji wê hatibû derxistin demeke dirêj e di rojevê de ye û ji Amerîkayê li ser mijarê daxuyaniyeke nû hat.
Balyozê Amerîkayê yê Enqereyê û Nûnerê Taybet ê Amerîkayê yê Kar û Barên Sûriyeyê Tom Barrack şertê Washingtonê yê ji bo vegera Tirkiyeyê eşkere kir.
Tom Barrack li ser hesabê xwe yê medyaya civakî daxuyanî da û diyar kir ku divê Tirkiye sîstema parastina asmanî ya S-400an a Rûsyayê bi kar neyîne û di destê xwe de nehêle.
Barrack anî zimên ku Amerîka derbarê daxwaza Tirkiyeyê ya vegera bernameya F-35an û xwedîbûna wê ya sîstema S-400an de bi Tirkiyeyê re hevdîtinan didomîne.
"Divê êdî di destê Tirkiyeyê de S-400 nebin"
Balyozê Amerîkayê di berdewamiya daxuyaniya xwe de ev şert danî:
"Li gorî yasayên Amerîkayê, ji bo Tirkiye vegere bernameya F-35an, divê êdî sîstema S-400 bi kar neyîne û di destê wê de nebe.
Pêwendiyên erênî yên di navbera Serokê Amerîkayê Donald Trump û Serokkomar Recep Tayyîp Erdogan de, jîngeheke nû ya hevkariyê ava kir."
"Em hêvîdar in bibe xaleke werçerxanê"
Tom Barrack bal kişand ser pêvajoya hevdîtinan û wiha dawî li axaftina xwe anî:
"Vê yekê rê li ber hevdîtinên herî berhemdar vekir ku me di salên dawî de li ser mijarê kirine.
Hêviya me ew e ku ev hevdîtin di mehên pêş de bibin sedema werçerxanekê ku pêdiviyên ewlehiyê yên hem Amerîka û hem jî yên Tirkiyeyê pêk tîne."
