Hewlêr (Rûdaw) - Serokê Amerîkayê Donald Trump derbarê êrişên Erebistana Siûdî û Yemenê yên li ser Hûsiyan ji Rûdawî re got ku "dê her tişt baş bibe."
Trump her wiha eşkere kir ku ew ji bo dan û standinên rasterast ên li gel Îranê amade ye û pêşbînî dike ku şerê li gel wî welatî gelekî bi lez bi dawî bibe.
Berpirsê Ofîsa Rûdawê ya Washingtonê Diyar Kurde ji Serokê Amerîkayê pirsî, "Nêrîna we li ser dijberêriş û operasyonên Siûdî û Yemeniyan ên li ser Hûsiyan çi ye?"
Donald Trump di bersivê de ji Rûdawê re got, "Dê her tişt baş bibe."
Trump pişt re ji bo medyayên din jî heman nêrîn piştrast kir û li ser operasyona leşkerî ya ku hatiye destpêkirin got:
"Êrişa Siûdî û Yemeniyan a li ser Hûsiyan gelekî baş bi rê ve diçe."
Hêzên Hikûmeta Yemenê ragihand ku wan ber bi Senaya paytext ve operasyoneke leşkerî daye destpêkirin.
Hikûmeta Yemenê serê sibeha vê îro eşkere kir ku hêzên wan bi piştgiriya Siûdiyeyê Tengava Babulmendebê bi temamî xistiye bin kontrola xwe.
Her wiha hat diyarkirin ku şer û pevçûnên li gel çekdarên Hûsiyan li herêmê didomin.
"Şer bi lez bi dawî dibe"
Derbarê dosyeya şerê Îranê de Serokê Amerîkayê ragihand ku rêya dîplomasiyê hîn jî vekirî ye û got:
"Deriyê min her tim ji bo dan û standinên rasterast ên bi Îranê re vekirî ye."
Trump mizgîniya bidawîhatina şer da û tekez kir, "Şerê li gel Îranê dê gelekî bi lez û bi rengekî ji rengan bi dawî bibe."
"Gefeke diyarkirî hebû"
Serokê Amerîkayê bal kişand ser metirsiyên ewlehiyê yên vê dawiyê û sedema vekişandina ji nişka ve ya Bombebaranê yên stratejîk ên Amerîkayê ya ji binkeya esmanî ya Brîtanyayê şirove kir.
Trump got, "Bi baweriya me gefeke diyarkirî hebû ku bû sedem em bombeavêjên xwe ji binkeyeke Brîtanyayê vekişînin.
Di dema niha de me ew balafir veguhastine cihekî gelekî dûr."
Li ser îhtimala destwerdana Îranê ya di şandina dronan de ber bi xaka Brîtanyayê, Trump hişyariyeke tund da û anî zimên:
"Ez nikarim piştrast bikim ka Îranê dron arasteyî Brîtanyayê kirine an na lê eger tiştekî wiha kiribe dê baceke gelekî giran bide."
Ev daxuyanî di demekê de ye ku Amerîkayê bi fermî vekişandina hemû balafirên bombebaranê yên stratejîk ên corê B-1ê ya ji binkeya esmanî ya Fairfordê ya Brîtanyayê piştrast kir.
Ev biryar ji ber "metirsiyên nû" yên li ser vê binkeyê hat dayîn ku berê ji aliyê Washingtonê ve ji bo êrişên li ser Îranê dihat bikaranîn, her çendî Hikûmeta Brîtanyayê tekezî li ser ewlehiya wê binkeya leşkerî dike.
