Hewlêr (Rûdaw) – Rojnameya navdar a Îsraîlê Yedioth Ahronothê hûrgiliyên dan û standinên nû yên di navbera Îsraîl û hikûmeta Sûriyeyê de eşkere kirin.
Li gorî raporê, Îsraîl amadebûna xwe nîşan daye ku ji hinek xalên leşkerî yên li Girên Golanê vekişe lê daxwaza Şamê ya derbarê qutkirina alîkariyên ji bo Durziyan bûye sedema nakokiyan.
Divê were gotin ku birêvebiriya Serokê Amerîkayê Donald Trump ji bo aramkirina herêmê zextan li her du aliyan dike.
Vekişîna ji 9 xalan û Çiyayê Şêxê
Li gorî zanyariyên ku rojnameya Îsraîlî spartine çavkaniyên ewlehiyê, di çarçoveya wan "peymanên ku niha li ser maseyê ne" de, Îsraîl pêşniyar dike ku ji 9 xalên leşkerî yên li Girên Golanê ku berê kontrol kiribûn, vekişe.
Her wiha tê gotin ku dan û standin li ser vekişîna Îsraîlê ji hinek deverên stratejîk ên li Çiyayê Şêx (Cebel el-Şêx) jî tên kirin.
Tel Avîv di bedêla vê yekê de, ji Şamê garantiyên ewlehiyê yên tund dixwaze da ku ew dever nebin cihê gefên li dijî Îsraîlê.
Nakokiya li ser Durziyan
Yek ji xalên herî tund ên nakokiyê di dan û standinên Sûriye û Îsraîlê de, mijara Durziyan e.
Çavkaniyan diyar kir ku hikûmeta Sûriyeyê wekî şertekî sereke daxwaz kiriye ku Îsraîl hemû alîkariyên xwe yên ji bo Durziyan rawestîne.
Tê zanîn ku di salên şerê navxweyî de (2011-2024), pêwendiyên nefermî di navbera Îsraîl û hinek serkirdeyên xwecihî yên Durziyan de çêbûbûn.
Hişyariya Artêşa Îsraîlê
Li aliyê din, Artêşa Îsraîlê nerazîbûna xwe li hemberî hinek bendên peymanê nîşan daye.
Fermandarên artêşê hişyariyê didin ku eger di çarçoveya peymanê de sînordarkirin li ser êrişên asmanî yên Îsraîlê yên li kûrahiya Sûriyeyê were danîn, ev yek dê bibe sedema bihêzbûna Hizbulaha Libnanê.
Artêşa Îsraîlê li ser mijarê dibêje:
"Her cûre sînordarkirina operasyonan, dibe ku rê li ber vebûna korîdorên qeçaxçîtiya çekan ji Îran û Îraqê ji bo Hizbulahê veke û metirsiyeke mezin çêbike."
Ev liv û tevgera dîplomatîk di bin sîwana zextên birêvebiriya Donald Trump de pêk tê.
Washington hewl dide ku bi rêya van peymanan, rewşa ewlehiyê li ser sînorên Îsraîl û Sûriyeyê aram bike û wekî gaveke destpêkê ji bo asayîkirina pêwendiyan di paşerojê de dibîne.
