Hewlêr (Rûdaw) - Hevserokê Giştî yê DEM Partiyê Tuncer Bakirhan diyar kir ku ew li bendê ne komên yekem ên gerîlayên PKKyê berî ku zivistan dest pê bike, vegerin.
Bakirhan di daxuyaniya xwe ya ji bo rojnameya Evrenselê de derbarê bipêşketinên dawî yên "Pêvajoya Aştî û Civaka Demokratîk", vegera yekem a gerîlayên PKKyê, rola Abdullah Ocalan, nîqaşên destûra nû û bipêşketinên li Rojavayê Kurdistanê nirxandinên berfireh kirin.
Bakirhan bal kişand ser wê yekê ku pêvajoya ji 1ê Çiriya Pêşîn a 2024an vir ve dest pê kiriye û pişt re gihîştiye biryara fesixkirina rêxistinê, danîna çekan û derxistina Yasaya Çarçoveyê, ji bo doza Kurdan a sedsalî ne bipêşketineke ji rêzê ye.
Hevserokê DEM Partiyê diyar kir ku ew pêvajoyê ne wekî xala dawî, belkî wekî destpêkeke xurt dibînin û wiha got:
"Em li bendê ne ku vegera yekem a endamên PKKyê ya Tirkiyeyê beriya ku zivistan dest pê bike, pêk were."
Bakirhan her wiha hişyarî da ku divê amadehiyên teknîkî nebin sedema bipaşxistinên siyasî û destnîşan kir ku zelalkirina mekanîzmayên vegerê û statûya hiqûqî dê amadehiya sereke ya herî ewle be.
“Belavbûna nezelaliyê dikare pêvajoyê xera bike”
Bakirhan got ku pêvajoya aştiyê dikare carinan hêdî bibe lê divê ev hêdîbûn bi derengxistina siyasî re tevlihev nebe.
Li gorî wî, divê komîte û desteyên têkildar zû bêne avakirin, erk û berpirsiyariyên wan bêne diyarkirin û mekanîzma ji bo danîna çekan û vegera kesên li derveyî welêt dê bêne mîsogerkirin.
“Em hêvî dikin vegera yekem berî zivistanê dest pê bike”
Bakirhan li ser vegera gerîlayên PKKyê wiha got, “Em hêvî dikin vegera yekem berî zivistanê dest pê bike. Em difikirîn ku Çiriya Pêşîn dikare ji vê aliyê ve destpêkek be.”
Wî her wiha got ku hîn tabloyeke zelal tune ku kîjan kom dê, bi kîjan dem û bi kîjan awayî vegerin Tirkiyeyê.
Bakirhan got ku kes dê venegere cihê ku statû, parastina yasayî û ewlehiya paşêrojê lê nebin.
“Em dixwazin Ocalan wekî koordînator bixebite”
Bakirhan li ser rola Abdullah Ocalan a di pêvajoya çekdanînê de got ku divê şertên yasayî û ragihandinê yên wî bêne baştirkirin.
Wî got ku ji bo Ocalan karibe di avakirina aştiyê û demokrasiyê de bibe beşdarê sereke, divê maf û şertên kar û ragihandinê ya wî bêne naskirin û amadekirin.
Her wiha DEM Partî dixwaze ku Ocalan di “Koordînasyona Bêçekbûn û Stratejiyê” de wek koordînator bixebite.
“Destnîşankirina destûra nû divê demokratîk be”
Bakirhan di mijara destûra nû de got ku Tirkiye hewcedariya destûreke nû û demokratîk heye.
Li gorî wî, destûra nû divê ne tenê li ser mijara hilbijartinê û hilbijartina kesekî were nîqaşkirin lê divê çareserkirina pirsgirêkên civakî, siyasî û aborî bi pêş bixe û hemû beşên civakê bigire nav xwe.
“Nirxandina rexneyên Demîrtaş wek dijberiya pêvajoyê ne rast e”
Bakirhan got ku rexneyên Selahattîn Demîrtaş ên derbarê pêvajoyê divê wekî dijberiya aştiyê neyên hesibandin.
Wî da zanîn ku rexnekirina rê û rêbazên pêvajoyê ne wateya devjêberdana pêvajoyê ye û Demîrtaş bi awayekî eşkere ji bo serkeftina pêvajoya aştiyê berpirsiyariyê hildigire.
“Rojava divê mijara xwe di hundirê xwe de çareser bike”
Bakirhan derbarê bipêşveçûnên li Sûriyeyê got ku hinek gav hatine avêtin ji bo naskirina mafên Kurdan û zimanê Kurdî lê ji bo perwerdeya bi zimanê dayîkê pêdivî bi peymaneke mayînde û yasayî heye.
Wî got ku Kurd di warên wekî fesixkirina binyada leşkerî û entegrasyona sazî û dezgehên dewletê de gavên mîsoger avêtine û niha Şam divê bi naskirina mafan û firehkirina qada siyaseta demokratîk bersiv bide.
Bakirhan derbarê mijara Mazlûm Ebdî jî got ku ev mijar divê di hundirê Rojavayê Kurdistanê de were gotûbêjkirin û biryar li ser were dayîn.
Bakirhan li ser skandala fonan: “Pere şopa xwe dihêle”
Bakirhan her wiha li ser krîza fonê axivî û got ku Tirkiye bi yek ji talanên herî mezin ên aborî yên dîrokê re rû bi rû ye.
Wî ev bûyer tenê wekî sextekariya aborî nehesiband û got ku li pişt vê skandalê pirsgirêkên kontrolê, pêwendiya aborî û siyasetê jî hene.
Wî ji berpirsên hikûmetê xwest ku li ser kesên ku di vê bûyerê de rol lîstine û mekanîzmayên ku kontrol nekirine, gavên rast û durist werin avêtin.
