Hewlêr (Rûdaw) - Birêvebiriya Giştî ya Tenduristiyê ya Silêmaniyê ragihand ku li Nexweşxaneya Fêrkarî ya Kezebê pûlekî domînoyê ji mîdeyê ciwanekî hatiye derxistin.
Pisporê serperiştyar da zanîn ku pûl mezin bûye û bi zehmetî hatiye derxistin.
Pisporê Nexweşiyên Kezebê Dr. Hîwa Ebûbekir serperiştiya emeliyata derxistina pûl kir.
Hîwa Ebûbekir ji Rûdawê re ragihand ku ew ciwanekî 14 salî yê astengdarê bihîstinê ye û di dema lîstika domînoyê de pûl di devê xwe de veşartiye û bêhemdî daqurtandiye.
Hîwa Ebûbekir diyar kir ku ew xelkê Çemçemalê ye û ji mexdûrên lehiyê ye lewma pûl çend rojan di mîdeyê wî de maye.
Pûl doh Çarşemê bi hevkariya tîmeke pispor a nexweşxaneyê hat derxistin.
Emeliyat bi rêya endoskopiyê û di bin pûçkirina giştî de hat kirin û nêzîkî 90 xulekan ajot.
Pisporê tenduristiyê diyar kir ku derxistina cismên biyanî yên mezin zehmet e.
Eger nehata derxistin dê çi bibûya?
Hîwa Ebûbekir li ser metirsiya mijarê got:
"Eger nehata derxistin dê derbasî rûvî û donzdegirêkê bûbûya û bûbûya sedema xitimîna rûviyan.
Ew yek dê bûbûya sedema encamên metirsîdar û diviyabû bi emeliyatê bihata derxistin."
Pisporan ji bo pêşîlêgirtina bûyerên wiha çend rênimayî dan:
- Divê kel û pelên ku bi hêsanî tên daqurtandin ji zarokan dûr bên girtin.
- Eger cismê biyanî di qirikê de asê mabe, nabe dest bixin qirika zarok û hewla derxistinê bidin, divê bigihînin nexweşxaneyê.
- Heta ku cism bi hêsanî tê derxistin nabe nexweş tiştekî bixwe yan vexwe.
- Eger cism çûbe boriya bêhnê (henase), divê teknîkên hawarhatina seretayî werin kirin yan jî yekser bibin nexweşxaneya herî nêzîk.
.webp&w=3840&q=75)