Hewlêr (Rûdaw) - Li Nepala ku lehiyê derbeke giran lê daye 2 kes ji bin kavilan bi saxitî hatin derxistin.
Piştî lehiyên li Nepalê ji ser hefteyekê zêdetir derbas bû û tîman 2 kes ji tuneleke hîdroelektrîkê rizgar kirin.
Li gorî nûçeya BBCyê, piştî ku lehiyeke mezin sînorê Nepal û Çînê wêran kir, li Projeya Hîdroelektrîkê ya Trishuli 3Ayê xebatên rizgarkirinê dest pê kir.
Wezareta Enerjiyê ji beşa Nepalî ya BBCyê re got ku piştî tîmên rizgarkirinê serê sibêha îro deng bihîstine, ew li bendê ne herî kêm 42 kesên din ji tunelê bên rizgarkirin.
Kesê yekem birin nexweşxaneyê
Li gorî nûçeyê, kesê yekem ê bi navê Sanjaya Shah ku hat rizgarkirin bi helîkopterê veguhastin nexweşxaneyeke bajarokê Battarê. Ev bajarok li bakurrojavayê paytext Kathmanduyê ye.
Kesê duyem ê bi navê Kabir Maharjan jî "amadehiyan dike" da ku here Nexweşxaneya Chhauniyê ku nexweşxaneyeke leşkerî ye li Kathmanduyê.
Bi hezaran kes winda ne
Lehî û hezazan navçeyên Rasuwa, Nuwakot, Dhading û Kavreyê û her wiha Geliyê Kathmanduyê yên Nepalê wêran kirin.
Her wiha lehiyê li Herêma Xweser a Xizangê ya Çînê ku wekî Tîbet tê naskirin, qada Bendera Gyirongê xist binê heriyê.
Nepalê piştrast kir ku di lehiyên hefteya borî de hezar û 259 kes mirine û 5 hezar û 83 kes jî winda ne.
Rayedarên Çînê jî diyar kir ku 21 kes mirine û lêgerîna ji bo 541 kesan berdewam dike.
Bi giştî li her du welatan hejmara miriyan bû hezar û 280. Bi giştî 5 hezar û 624 kes hîn jî winda ne ku 844 ji wan biyanî ne.
