Hewlêr (Rûdaw) – Piştî desteserkirina Ekrem Îmamoglu dolar û euro çûn û hey çûn. Dolar bi ser 40 lîreyî ket, euro jî bi ser 44 lîreyan.
Di çarçoveya lêpirsîna li ser Şaredariya Bajarê Mezin a Stenbolê de derbarê 100 kesî biryara desteserkirinê hat dayîn û Serokê Şaredariya Bajarê Mezin a Stenbolê Ekrem Îmamoglu jî hat desteserkirin.
Piştî vê operasyonê li bazarên diravan ên Tirkiyeyê guherîneke mezin çêbû û bêqîmetbûna lîreyê Tirkî gihişt asteke dîrokî.
Her dolarekî Amerîkî gihişt 40,90 lîreyên Tirkî û euro li 44 lîreyan jî nesekinî û heta bi 44,60 lireyî çû.
Divê were gotin ku berî vê operasyonê dolar 36,69 lîre û euro jî 40,16 lîre bû.
Di çarçoveya lêpirsîna li ser Şaredariya Bajarê Mezin a Stenbolê de derbarê 100 kesî biryara desteserkirinê hat dayîn.
Serokê Şaredariya Bajarê Mezin a Stenbolê Ekrem Îmamoglu jî hat desteserkirin.
Li ser Ekrem Îmamoglu dest bi lêpirsîneke duyem jî hat kirin û ew bi “PKK/KCKyê” re hat têkildarkirin.
Serokê Şaredariya Şişliyê ya Stenbolê Resul Emrah Şahan, şêwirmendê Îmamoglu yê çapemeniyê Murat Ongun, rojnameger Îsmaîl Saymaz û Serokê Şaredariya Beylîkduzuyê Murat Çalik jî hatin desteserkirin.
Li hêla din, Stasyona metroyê ya Taksîmê jî bi biryara Parêzgariya Stenbolê hat girtin û dê sefer neyên kirin.
Parêzgariya Stenbolê di navbera 19-23yê Adarê de civîn û xwenîşandan qedexe kirin.
