Tiflîs (Rûdaw) – Li Tiflîsa paytexta Gurcistanê karsazên Kurd û Gurcî li hev civiyan.
Karsazên Kurd ên ji Gurcistan, Qazaxistan, ji Başûr û ji Rojavayê Kurdistanê her wiha ji Ewropayê, li gel Yekîtiya Bazirganiyê ya Gurcistanê perspektîfên hevkariyê gotûbêj kirin.
Kombûn bi serpereştiya Yekîtiya Karsaziyê ya Kurdistan û Gurcistanê hatiye lidarxistin ku beriya çend mehan hatiye damezirandin.
Yekîtiya Karsaziyê ya Kurdistan û Gurcistanê Otar Nadiryan anî ziman:
“Me li hev kir ku li Tiflîsa paytexta Gurcistanê bi beşdariya karsazên Kurd ên ku li dewletên cuda ku karsazî û bazirganiyê dikin Foruma Bazirganiyê saz bikin.
Ji xwe armanca kombûna me ya îro ew e ku karsazên Kurd û karsazên Gurcî bînin ba hev da ku rêyên hêsankirina veberhênana karsazên Gurcî li Kurdistanê û û yên Kurdan li Gurcistanê gotûbêj bikin.”
Di salên dawî de Gurcistan dibe navendeke veberhênan û bazirganiyê lewma çend dehlîzên veguhastinê yên heyî û yên potensiyal ji wî welatî re derbas dibin.
Cîgirê Serokê Yekîtiya Bazirganiyê ya Gurcistanê Akakî Saxîraşvîlî jî got:
“Vê gavê li Gurcistanê karsaziya di sektora avahîsaziyê de pir baş bi pêş de diçe.
Bi nêrîna me ev sektor xwedî potansiyaleke mezin e ji bo hevkariya li gel karsazên Kurd.
Her wiha sektora geşt u guzariyê ku beşeke girîng a aboriya me ye, em wekî sektoreke ji bo hevkariyê dibînin.”
Di gotûbêjan de karsazên Kurd û Gurcî hem potensiyala welatên xwe bi hev dan nasîn, hem jî sektorên gengaz ên bazirganiyê yên ji bo hevkariyê raxistin ser mêzê.
Karsazê Kurd ê ji Qazaxistanê Wezîr Mîrzoyev da zanîn:
“Ez li Qazaxistanê di navbera Çîn, Qazaxistan, Tirkiye û welatên din de karê lojîstîkê ango transportê dikim.
Pêşniyara min a hevkariyê gelekî bi xweşiya wan çû û bi niyet in ku vî karî li vir jî berdewam bikin.”
“Divê siyasetmedar xwe biguncînin”
Karsazê Gurcî Georgî Ûdzîlaurî jî got:
“Li vir hejmareke mezin a Kurdan dijîn ku ji bo wan serdana Kurdistanê arîşeyeke mezin e.
Wekî mînak, kesên ku dixwazin biçin ziyareta pîroziyên dînî an jî ji bo hevdîtin û hevkariya bazirganiyê hene.
Loma divê siyasetmedarên her du welatan hizir bikin ka çawa xwe li gorî leza bazirganiyê biguncînin.”
Gurcistan di navbera Ewropa û Asyayê de ye û di demeke nêzîk de dê bibe navendeke girîng a veguhastinê ya Rêya Hewrişîmê ya nûjen.
Yek ji sektorên sereke yên aboriya Gurcistanê turîzm e ku salane zêdetirî 4 milyar dolar ji budçeyê re tîne.
Sala 2022an li Gurcistanê di sektora hilberînê de 3 hezar û 905, di sektora xizmeguzariyê de 2 hezar û 934 û di bazirganiyê de jî hezar û 36 kompanya ketibûn lîsteya fermî ya dewletê lê îro ev hejmar du caran zêde ye.
