Photo by THOMAS KIENZLE / AFP / AFP
رووداو دیجیتاڵ
جارێکی دیکە دێنیز ئونداڤ، یاریزانی کورد، سەرکردایەتی یانەی شتوتگارتی کرد بۆ بەدەستهێنانی سەرکەوتنێکی گەورە بەسەر بۆرووسیا دۆرتمونددا.
شتوتگارت لە گەڕی چوارەمی بوندێسلیگدا، میوانداریی بۆرووسیا دۆرتموندی کرد و 5-1 لێیبردەوە، کە بەشی یاریزانە کوردەکە دوو گۆڵ بوو.
دێنیز ئونداڤ، چوار خولەکی پێویست بوو بۆ ئەوەی تۆڕی بۆرووسیا دۆرتموند بهەژێنێت. دواتر ئێرمدین دیمیرۆڤیچی هاوڕێی لە خولەکی 21 گۆڵی دووەمی بۆ شتوتگارت تۆمارکرد و نیوەی یەکەم بە دوو گۆڵی بێبەرامبەر لە بەرزەوەندی ئونداڤ و هاوڕێکانی کۆتاییهات.
لە گێمی دووەمدا ئینزیۆ میلۆت لە خولەکی 62 گۆڵی سێیەمی بۆ تیپی خاوەن یاریگا تۆمارکرد، دواتر سێرهۆ جیراچی یاریزانی پێشووی شتوتگارت جیاوازییەکەی بۆ بۆرووسیا دۆرتموند کەمکردەوە و تاکە گۆڵی زەردپۆشەکانی لە خولەکی 75 تۆمارکرد.
پاشان شتوتگارت دوو گۆڵی دیکەی تۆمارکرد، بیلال تۆرێ لە خولەکی 80گۆڵی چوارەمی تۆمارکرد و دێنیز ئۆنداڤیش لە دواخولەکدا گۆڵی دووەمی خۆی و پێنجەمی یانەکەی تۆمارکرد.
هێرشبەرە کوردەکەی یانەی شتوتگارت تاوەکو ئێستا 3 گۆڵی لە بوندێسلیگادا هەیە، کە هاری کەینی هێرشبەری ئینگلیزیی یانەی بایرن میونشن، بە تۆمارکردنی 5 گۆڵ پێشەنگی ریزبەندیی گۆڵکارانی بوندێسلیگای گرتووە.
بەم سەرکەوتنە شتوتگارت بە 7 خاڵ گەیشتە پلەی حەوتەمی ریزبەندیی و دۆرتموندیش 7 خاڵی هەیە لە پلەی هەشتەمە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ