رووداو دیجیتاڵ
یانەی ریال مەدرید دوای بردنەوەی نازناوی جامی ئینتەرکۆنتێنتال یەکەم یاریی ئەنجامدەدات و دەیەوێت سوود لە دۆڕانی بارسێلۆنای رکابەری وەربگرێت، بۆ گەڕانەوە بۆ پلەی دووەمی ریزبەندی خولەکە.
ئەمڕۆ ئێوارە لە رکابەرییەکانی گەڕی هەژدەی لالیگادا، ریال مەدرید لە سانتیاگۆ بێرنابیۆ بەرامبەر یانەی سێڤییا یاری دەکات و دەیەوێت رکابەری لەسەر بردنەوەی سێ خاڵی دیکە بکات.
ریال مەدرید چەند رۆژێکی کەم لەمەوبەر نازناوی جامی ئینتەرکۆنتێنتالی لە قەتەر بەدەستهێنا و ڤینیسیۆس جونیۆریش وەکو باشترین یاریزانی جیهان خەڵاتی زە بێستی بردەوە، ئەمە یەکەم یارییانە دوای بردنەوەی ئەو دەستکەوتانە.
سێڤییا لەم وەرزەدا ئەنجامەکانی وەکو پێویست نین و لە دوای 17 یاری تەنیا 6 بردنەوەی هەیە و لە پلەی دوازدەیەمی ریزبەندە، بەڵام لەگەڵ ئەوەشدا یانەکە دەیەوێت لە دەرەوەی یاریگەی خۆی بەبێ دۆڕان بچێتە دەرەوە.
بەبردنەوەی یارییەکەی ئەمڕۆیان، یانەی ریال مەدرید دەچێتە پلەی دووەمی ریزبەند و تەنیا خاڵێک لە ئاتلێتیکۆ مەدریدی یەکەمەوە دوور دەبێت.
لە یارییەکەی ئەمڕۆدا، ڤینیسیۆس جونیۆر بەهۆی کەڵەکەبوونی کارتە زەردەکانییەوە بەشداری لە یارییەکەدا ناکات، بەڵام ئێمباپێ و بێلینگهام ئامادەن و دەیانەوێت سەرکردایەتی دوایین بردنەوەی یانەکەیان بکەن لە ساڵی 2024ـدا.
.jpg&w=3840&q=75)