رووداو هەولێر
لە گەڕی 15ـی خولی ئەستێرەکانی عێراق، ئەمڕۆ دووشەممە کاژێر 16:30 یانەی کەربەلا لەنێو یاریگەی خۆیدا میوانداریی یانەی هەولێر دەکات.
هەولێر وەرزی ئەمساڵ ئاستێکی خراپی هەیە و ئەنجامە خراپەکانی نیگەرانی و کاردانەوەی ناڕەزایەتی تووندی هاندەرانی لێکەوتەوە، بۆ ئەم یارییە تیپەکە دەیەوێت بە بەدەستهێنانی 3 خاڵی یارییەکە دڵی هاندەرانی خۆش بکات.
درێس زەردەکانی قەڵا و منارە دوو رۆژە گەشتی شاری کەربەلایان کردووە، تیپەکە بەسەرپەرشتی حەیدەر عەبدولئەمیری راهێنەر دوایین یەکەی ئامادەکارییان ئەنجامداوە.
ئیبراهیم قادر، بەرپرسی راگەیاندنی یانەی هەولێر، لە لێدوانێکی تایبەتدا بۆ تۆڕی میدیایی رووداو، رایگەیاند "بەگشتی مۆڕاڵی تیپەکە بەرزە و راهێنەر کاری لەسەر بەرزکردنەوەی ورەی یاریزانان کردووە، هاتنی ژمارەیەکی زۆری هاندەریش بۆ شاری کەربەلا کاریگەری ئەرێنی لەسەر ئەنجامی یارییەکە دەبێت، ئێمە بۆ وەرگرتنی سێ خاڵی یارییەکە تێدەکۆشین".
یانەی هەولێر لە وەرزی ئەمساڵی خولی ئەستێرەکانی عێراق 13 یاری ئەنجامداوە، 3 یاری بردووەتەوە، 4 یەکسانبوون و 6 دۆڕانی هەیە، تیپەکە خاوەن سیانزدە خاڵە لە پلەی شازدەی ریزبەندیی خولەکەیە.
هەر ئەمڕۆ لە خولی ئەستێرەکانی عێراق ئەم یارییانە بەڕێوەدەچن:
حدود - نەجەف
تەڵەبە - شورتە
یارییەکانی وەرزی ئەمساڵی خولی ئەستێرەکانی عێراق بۆ یەکەمجار لە مێژووی عێراقدا بەشێوازی پیشەگەری و بەهاوکاری دەستەی لالیگای ئیسپانی بەڕێوەدەچن، کە 20 یانە بەشدارن و لەنێویاندا چوار یانەی کوردستان بەشدارن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ