رووداو دیجیتاڵ
ئەمشەو لە یارییەکی ئاگریندا هەردوو یانەی ئینتەرمیلان و ناپۆلی رووبەڕووی یەک دەبنەوە و چاویان لە وەرگرتنی پلەی یەکەمە.
تا دێت رکابەریی خولی ئیتاڵی تووندتر دەبێت، بەشێوەیەک دوای تێپەڕبوونی 11 گەڕ، جیاوازی خاڵەکانی نێوان پلەی شەشەم و پلەی یەکەم تەنیا سێ خاڵە، بەڵام ئەو رکابەرییە سەختترە لەنێوان ناپۆلی و ئینتەر میلان.
ناپۆلی لەژێر سەرکردایەتی ئەنتۆنیۆ کۆنتی، بەکۆکردنەوەی 25 خاڵ لە پلەی یەکەمی خولەکە دێت و چاوی لەوەیە درێژە بەوە بدات.
لەلایەکی دیکەوە یانەی ئینتەرمیلان بەکۆکردنەوەی 24 خاڵ لە پلەی دووەم دێت و کوڕانی سیمیۆنی ئینزاگی دوای گەڕانەوەیان لە چامپیۆنزلیگ بەبردنەوەیەکی گرنگی لە بەرامبەر ئارسیناڵی ئینگلیزی، چاویان لەوەیە پلەی یەکەم لە ناپۆلی بسێننەوە و بگەڕێنەوە شوێنی ئاسایی خۆیان.
رۆمێلۆ لوکاکۆ دوای شادبوونەوەی بە کۆنتی، دووبارە گەڕاوەتەوە ئاستی پێشووتری و لەم وەرزەدا لەگەڵ یانەی ناپۆلی، بەشداری لە هەشت گۆڵدا کردووە.
هاوشانی کڤاراستیخیلیا، ئەویش توانیویەتی بەشداری لە حەوت گۆڵ بکات و لەگەڵ لوکاکۆ سەرکردایەتی هێڵی هێرشبەری ناپۆلی دەکەن.
لەلایەکی دیکەوە یانەی ئینتەرمیلان، مارکۆس تۆرام، ئەستێرەی یانەکە بە حەوت گۆڵ و دوو ئەسسیست سەرکردایەتی نێرازوری دەکات.
هاوکات، چاوەکان لەسەر ئەستێرەی ئەرجەنتینی، لاوتارۆ مارتینێز دەبن، ئەو یاریزانە لە خولی ئیتاڵی لەم وەرزە، پێنج گۆڵی تۆمارکردووە و دوو ئەسیستی کردووە.
هەردوو یانە بە رێگەی جیاواز هەوڵ بۆ یەک ئەنجام دەدەن، ئەویش گرتنەوەی پلەی یەکەمی سێری ئا پێش ئەوەی یاریزانەکان گەشت بکەن بۆ هەڵبژاردەکانیان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ