رووداو دیجیتاڵ
یانەی بارسێلۆنا سەرکەوتنێکی گرنگ و زۆر زەحمەتی بەدەستهێنا و لە دوایین خولەکدا 3 خاڵی گرنگی بەدەستهێنا.
بارسێلۆنا لە گەڕی 12ـی لالیگادا، لەسەر یاریگەی ئانۆیتا بووە میوانی یانەی ریال سۆسیداد و زۆر بە زەحمەت بە گۆڵێکی بێبەرامبەر لێیبردەوە.
تیپی خاوەن یاریگە بە گوشار دروستکردن لەسەر گۆڵی تیپی میوان دەستیپێکرد و چەندجارێک هەڕەشەی لە گۆڵی بارسا کرد، بەڵام نیوەی یەکەم بەبێ گۆڵ کۆتاییهات.
نیوەی دووەمیش بە هەمان ئەنجام بەرەو کۆتایی دەڕۆیشت، بەڵام ئاراوخۆ قسەیەکی دیکەی هەبوو، و توانی لە خولەکی 90+2 تاکە گۆڵی بارسا و یارییەکە تۆمارکرد.
بەم سەرکەوتنە بارسێلۆنا بە کۆکردنەوەی 27 خاڵ گەڕایەوە پلەی سێیەمی ریزبەندیی لالیگا. ریال سۆسیدادیش بە کۆکردنەوەی 19 خاڵ لە پلەی شەشەمدایە.
