رووداو دیجیتاڵ
یاریزانێکی یانەی ڤالێنسیای ئیسپانی لەلایەن بەشێکی هاندەرانی ریال مەدریدەوە رووبەڕووی کرداری رەگەزپەرستی و قسەی نەشیاو دەبێتەوە و یانەکەشی راگەیێنراوێک لەوبارەیەوە بڵاودەکاتەوە.
لە گەڕی 27ـی لالیگادا، یانەی ریال مەدرید رووی لە یاریگەی مێستایا کرد و بووە میوانی ڤالێنسیا، یارییەکە چەندین رووداوی مشتومڕ هەڵگری لەخۆگرت و بەپێی هەواڵەکان ڤینیسیۆس جونیۆری هێرشبەری ریال مەدرید رووبەڕووی رەگەزپەرستی بووەتەوە و لالیگاش لێکۆڵینەوەی لەوبارەیەوە دەستپێکردەوە.
لە خولەکی 73ـی یارییەکەدا، پیتەر فێدێریکۆی تەمەن 21 ساڵ، کە لە ئەکادیمیای ریال مەدرید بووە و ئێستا بە خواستن لە ڤالێنسیایە، دێتە نێو یاریگا و بە جۆش و خرۆشێکی زۆرەوە یاری دەکات. دواتر لە یەکێک لە دیمەنەکاندا دەردەکەوێت کە فێدێریکۆ دەستەکانی بەرز دەکاتەوە و داوا لە هاندەرانی نێو یاریگا دەکات زیاتر هانیان بدەن.
ئەو کارەی یاریزانەکە تووڕەیی بەشێکی هاندەرانی ریال مەدرید لێکەوتەوە و لە بەشی کۆمێنتی یەکێک لە پۆستەکانیدا لە تۆڕی کۆمەڵایەتی ئینستاگرام، چەندین قسەی رەگەزپەرستانە، گاڵتەکردن بە ستایلی قژ و قسەی نەشیاوی دیکەی بەرامبەر کرا، ئەوەش وای لە فێدێریکۆ کرد کۆمێنتی پۆستەکانی رابگرێت بۆ ئەوەی قسەی ناشرینی بەرامبەر نەکرێت.
راگەیێنراوی یانەی ڤالێنسیا
ڤالێنسیا لەوبارەیەوە دێتە دەنگ و لە راگەیێنراوێکی فەرمیدا دەڵێت "ڤالێنسیا پابەندبوونی خۆی بە بەرەنگاربوونەوەی رەگەزپەرستی بە هەموو شێوەیەک دووپات دەکاتەوە. هەندێک قسە کە بەرامبەر پیتەر فێدێریکۆی یاریزانمان کراوە، بەتەواوی رێگەپێنەدراوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ