رووداو دیجیتاڵ
یانەی بارسێلۆنا سەرکەوتنێکی زۆر گرنگ بەڵام زەحمەتی بە ئەنجامی 1-0 بەرامبەر سێلتا ڤیگۆ لە لالیگا تۆمار کرد. یارییەک کە پڕ بوو لە رووداوی دراماتیکی کە کاریگەرییان لەسەر ئەنجامەکەش هەبوو.
تاکە گۆڵی یارییەکە لە خولەکی 41 لەلایەن لامین یامالەوە تۆمارکرا، کە خۆی لێدانێکی سزای بەدەستهێنا و بە سەرکەوتوویی گۆڵی کرد. بەڵام دڵخۆشییەکە زۆری نەخایاند، چونکە یەکسەر دوای لێدانی تۆپەکە، یامال تووشی پێکانێکی ماسولکەیی بوو. ئەو یاریزانە گەنجە نەیتوانی یارییەکە تەواو بکات و راستەوخۆ بەرەو ژووری جلگۆڕین رۆیشت، ئەمەش ترس و دڵەڕاوکێی لای هاندەران دروستکرد لەم قۆناخە هەستیارەی وەرزەکەدا.
یارییەکە لە یاریگای 'کامپ نو' بۆ ماوەی زیاتر لە 10 خولەک راگیرا، ئەمەش بەهۆی حاڵەتێکی کتوپڕ لە نێو هاندەراندا. یاریزانانی هەردوو تیپ یارییەکەیان راگرت تاوەکو تیمە پزیشکییەکان چارەسەری یەکێک لە هاندەرەکان بکەن، ئەم وەستانە کاریگەری لەسەر ریتمی یارییەکە هەبوو.
فێران تۆرێس گۆڵێکی یکەی تۆمارکرد، بەڵآم لەلایەن تەکنەلۆژیای VARـەوە بەهۆی ئۆفسایدەوە رەتکرایەوە، کە ئەم بڕیارەش مشتومڕێکی زۆری دروستکرد بەهۆی ئەوەی بڕیارەکە جێی گومان بوو.
لە بەرامبەردا، یانەی سێلتا ڤیگۆ ئاستێکی باشی پێشاندا و چەند جارێک هەڕەشەی کرد، بەڵام نەیانتوانی گۆڵ تۆمار بکەن. بەرگری و گۆڵپارێزی بارسا تاوەکو کۆتایی یارییەکە پارێزگارییان لە ئەنجامەکە کرد.
هەواڵە ناخۆشەکان بۆ بارسا بەردەوام بوون کاتێک جواو کانسیلۆش لە کاتی یارییەکەدا تووشی پێکان بوو.
بەم سەرکەوتنە، بارسێلۆنا پێگەی خۆی لە پێشەنگی لالیگا پاراست و گوشارەکانی بۆ سەر ریال مەدریدی رکابەری بەردەوام کرد، بەڵام رووداوەکانی ئەم شەوە بەتایبەتی پێکانی لامین یامال لەوانەیە لە سێ خاڵەکە گرنگتر بن، چونکە یانەکە چاوەڕێی هەواڵی پزیشکییە دەربارەی دۆخی پێکانی ئەم یاریزانە.
