رووداو دیجیتاڵ
راپۆرتێکی رۆژنامەڤانی، ئەمڕۆ پێنجشەممە ئاشکرای کرد کە کیلیان ئێمباپێ، یاریزانی فەرەنسیی یانەی ریال مەدرید، رۆژی شەممەی داهاتوو رووبەڕووی ئەرکێکی زۆر سەخت دەبێتەوە.
ئێمباپێ لە کاتی یارییکردن لەگەڵ هەڵبژاردەی فەرەنسا بەرامبەر تورکیا لە خولی نەتەوەکانی ئەورووپا تووشی پێکان بوو و گەڕایەوە مەدرید بۆ وەرگرتنی چارەسەر، بەڵام بەهۆی گەشتکردن بۆ فەرەنسا و ئەو پەیامانەی لە تۆڕە کۆمەڵایەتییەکان بڵاوی کردنەوە، هەرایەکی گەورەی نایەوە.
ئێمباپێ هەوڵی ئاشتکردنەوەی هاندەران دەدات
رۆژنامەی 'مۆندۆ دێپۆرتیڤۆ' رایگەیاندووە، دوای دابەزینی ئاستی لە هەفتەکانی رابردوودا، کیلیان ئێمباپێ هەوڵ دەدات هاندەرانی ریال مەدرید ئاشت بکاتەوە.
دوێنێ چوارشەممە وەک هەموو یاریزانەکانی دیکە مەشقی لەگەڵ تیپەکەدا کرد، دوای گەشتێکی خێرا بۆ پاریس لە پاشنیوەڕۆی سێشەممەدا بۆ بەشداریکردن لە چالاکییەکی خێرخوازی، کە دواتر لە کاتەکانی سەرەتای بەیانیی چوارشەممەدا گەڕایەوە پایتەختی ئیسپانیا.
لە کاتی راهێنانەکاندا، ئێمباپێ بە رووخسارێکی بەپێکەنین و بە بارودۆخێکی جەستەیی باشەوە دەرکەوت بۆ رووبەڕووبوونەوەی ڤیاریال لە رۆژی شەممەی داهاتوودا، لەگەڵ گەڕانەوەی خولی ئیسپانی دوای وەستانی نێودەوڵەتی.
مۆرینیۆ بڕیاری کۆتایی سەبارەت بە بەشداریکردنی وەک یاریزانی سەرەکی پێش یارییەکە دەدات، سەرەڕای ئەوەی هەموو ئاماژەکان بۆ بەشداریکردنی دەچن، بەڵام لە سێبەری ئەم دەنگۆیانەی دەوروبەری یاریزانە فەرەنسییەکەدا، رای راهێنەرەکە بە نادیاری دەمێنێتەوە.
مۆرینیۆ، کە دەگوترێت کەسایەتی و دەسەڵاتێکی جێبەجێکاری گەورەتری لە هەر ئەستێرەیەکی نێو ژووری جلگۆڕین هەیە، قسەی لەسەر ئەوە نەکردووە کە لە رۆژانی رابردوودا روویداوە، بەتایبەتی رووداوی پایسکیلەکە کە هەرایەکی گەورەی دروست کرد، بەڵام کاتێک پێش یارییەکەی ڤیاڕیال قسە دەکات، رەنگە چەندین شت بگۆڕێن.
هاندەران فیکەی ناڕەزایی بۆ ئێمباپێ لێدەدەن
دوای هەموو ئەو رووداوانەی لە ماوەی وەستانەکەدا روویان دا، چاوەڕوان دەکرێت مشتومڕ و ناڕەزایەتییەکی زۆر لەلایەن هاندەرانی ریال مەدریدەوە بەرامبەر یاریزانە فەرەنسییەکە و یاریزانانی دیکە پێشان بدرێت دوای دۆڕانیان لە دێربیی مەدریددا.
