Hewlêr (Rûdaw) – Werzişkarê Kurd Hekar Gerdî di pêşbirka navneteweyî ya Muay Thaiyê ya li bajarê Phuketê yê Taylandê de bû şampiyon.
Hekar Gerdî di fînalê de pêşbirkê de hevrikê xwe yê Alman têk bir û serkeftineke mezin tomar kir.
Hekar Gerdiyê 27 salî ji Hewlêrê ye û zêdetirî 15 salan e di Muay Thai, Kick Boks, Boks û hunerên têkoşînê de bi awayekî profesyonel dixebite.
Werzişkarê serkeftî ku li seranserî Îraq û Herêma Kurdistanê tê naskirin, berê di gelek pêşbirkên neteweyî û navneteweyî de derece bi dest xistibûn.
Serkeftina mezin a li Taylandê
Gerdî beşdarî pêşbirka navneteweyî ya Muay Thaiyê ya ku li bajarê Phuketê yê Taylandê hat lidarxistin bû, hevrikê xwe yê Alman nakawt kir û xelata şampiyoniyê bi dest xist.
Werzişkarê Kurd Hekar Gerdî piştî serkeftina xwe daxuyaniyek da û got:
“Ji bo min wekî Kurdekî, beşdariya van pêşbirkan a bi navê Kurdistanê serbilindiyeke mezin e.
Ez dixwazim nîşanî tevahiya cîhanê bidim ku em jî xwedî werzişkarên xurt in.”
Hekar Gerdî ji bo ku beşdariya pêşbirka navneteweyî ya mezin meha bê ya li Bangkoka paytetxta Taylandê bibe xwe amade dike.
Ew dê li wir rûbirûyî hinek ji werzişkarên Muay Thaiyê yên herî bi hêz ên cîhanê bibe.
Gerdî spasiya piştgirên xwe kir û anî ziman:
“Ez spasiya Mele Mistefa Barzanî û Şêx Mehend Sîrwan Barzanî dikim ku piştgirî da min.
Bi saya alîkariyên wan ez hatim vir û min ev xelat bi dest xist.
Ez dê di paşerojê de bihêztir têbikoşim.”
Serkeftinên Hekar Gerdî yên li qada navneteweyî
Serkeftina herî mezin a Hekar Gerdî ya li qada navneteweyî, bidestxistina şampiyoniya pêşbirka hunerên têkoşînê bû ku sala 2022yan li Efxanistanê hat lidarxistin.
Sala 2023yan jî di pêşbirka cîhanê ya kick boksê de li Endonezyayê bû duyem.
Gerdî ji bo berdewamkirina serkeftinên xwe û zêdekirina performansa xwe çû Taylandê û li wir 25 rojan di bin çavdêriya rahênerên pispor de li Bangkokê kamp kir û xwe amade kir.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse