Hewlêr (Rûdaw) - Fermandariya Navendî ya Amerîkayê (CENTCOM) da zanîn ku di operasyonê de Ziya Zawba Muslih El Hardanî û du kurên wî hatine kuştin.
CENTCOMê ragihand ku li navçeya Babê ya li bakurê Sûriyeyê, di operasyonekê de serkirdeyekî payebilind ê DAIŞê hat kuştin.
CENTCOMê li ser hesabê xwe yê Xê daxuyaniyek belav kir û diyar kir ku hêzên wan berbangê li navçeya Babê ya girêdayî parêzgeha Helebê ve operasyonek li dijî serkirdeyê payebilind ê DAIŞê Ziya Zawba Muslih El Hardanî pêk aniye.
Di daxuyaniyê de hat eşkerekirin ku di encama operasyonê de Hardanî û du kurên wî yên mezin ên ku pêwendiya wan bi DAIŞê re hebû hatine kuştin.
Her wiha hat gotin ku ew endamên DAIŞê ji bo Amerîka, hêzên koalîsyonê û hikûmeta nû ya Sûriyeyê tehdîd bûn.
Fermandarê CENTCOMê General Michael Erik Kurilla jî li ser operasyonê got:
"Em dê li kû derê bin bila bibin, şopandina terorîstên DAIŞê bi awayekî bê rehm bidomînin.
Terorîstên DAIŞê li cihên ku radizên, kar dikin û xwe vedişêrin, ne di ewlehiyê de ne.
CENTCOM, li gel hevkar û hevpeymanên me, bi biryar e ku terorîstên DAIŞê yên ku gefê li herêmê, li hevpeymanên me û li welatê me dixwin, bi awayekî mayînde têk bibe."
