Hewlêr (Rûdaw) - Serokwezîrê Îraqê Mihemed Şiya Sûdanî li Foruma Silêmaniyê got, “Me welatê xwe ji pevçûnên herêmê dûr xist û Îraq bûye navendeke aramiyê.”
Foruma Silêmaniyê îro demjimêr 10:00an dest pê kir û dê sibe biqede.
Forum mêhvandariya gelek siyasetmedar û serkirdeyên bibandor dike.
Serokwezîrê Îraqê Mihemed Mihemed Şiya Sûdanî beşdarî Foruma Silêmaniyê ya ku ji aliyê Zanîngeha Amerîkî ya Silêmaniyê ve hat lidarxistin bû û gotarek pêşkêş kir.
Sûdanî di destpêka axaftina xwe de Silêmanî wekî “bajarê xweşikî, çand, huner û dîrokê” bi nav kir û pesnê helwesta bajêr a li dijî dîktatorî û zordariyê da.
Sûdanî diyar kir ku Silêmanî, wekî Herêma Kurdistanê û bajarên din ên Îraqê, berhemên bipêşketina berdewam û aramiyê berhev dikin.
Sûdanî tekez kir ku hikûmet ji bo aramiya welatiyan û jiyaneke çêtir bi berdewamî dixebite.
Xebatên hikûmetê
Serokwezîrê Îraqê destnîşan kir ku hikûmet di 2 sal û nîvan a xebata xwe de, ji bo gihîştina armancên xwe gelekî xebitiye.
Sûdanî anî zimên ku di warê projeyên binesazî, tenduristî, perwerde û enerjiyê de gavên girîng hatine avêtin û bi taybetî projeyên enerjiya rojê û enerjiya nûjen hatine destpêkirin, aboriya derveyî petrolê hatiye mezinkirin û dahatên gumrikê bi rêjeya ji sedî 128 hatine zêdekirin.
Her wiha Sûdanî ragihand ku rêjeya enflasyonê li gorî 2 salên berê ji sedî 2,7 hatiye xistin.
Helwesta herêmî û navneteweyî
Serokwezîrê Îraqê Mihemed Şiya Sûdanî da zanîn:
“Me Îraq ji pevçûnên herêmî dûr xist û bûye platformeke aramiyê.”
Sûdanî li ser pirsa Filistînê û mafên gelê Filistînê careke din anî zimên û diyar kir ku wan helwesteke zelal li hemberî êrişên Îsraîlê yên li dijî Xeze û Libnanê nîşan daye.
Mihemed Şiya Sûdanî her wiha diyar kir ku Îraq ji bo pirsgirêkên cîhanî yên wekî guherîna avhewayê, krîza xwirekê ya cîhanî û tevlîheviya di bazara enerjiyê de gav avêtine.
Aştiya civakî û berpirsyariya neteweyî
Sûdanî tekez kir ku rewşa aştî û ewlehiya civakî nabe ku rastî metirsiyan were.
Serokwezîrê Îraqê Mihemed Şiya Sûdanî got:
“Hikûmet ne li gorî hesabên siyasî, li gorî hişmendiya berpirsyariya neteweyî tevdigere û em ji bo dabînkirina xizmetên bingehîn ên welatiyan bê rawestan dixebitin.”
Sûdanê diyar kir ku wan dirûşma “hikûmeta xizmetê” qebûl kiriye û amanca wan avakirina peymana civakî ya li ser bingeha baweriyê ya di navbera welatiyan û hikûmetê de ye.
Armanca Îraqeke xurt
Sûdanî di dawiya axaftina xwe de anî zimên ku Îraq li ser rêya avakirina dewleteke xurt û sîstemeke birêvebirina berpirs, bi gavên ewle bi pêş de diçe.
Serokwezîrê Îraqê axaftina xwe bi spasiya Zanîngeha Amerîkî ya Silêmaniyê û Serokkomarê berê yê Îraqê Dr. Berhem Salih bi dawî kir.
