Hewlêr (Rûdaw) - Alîkarê Serokê CHPyê Burhanettîn Bulut ragihand, Serokê Sûriyeyê Beşar Esed daxwaza serdana Serokê CHPê Ozgur Ozel qebûl kir.
Alîkarê Serokê CHPyê Burhanettîn Bulut îro beşdarî bernameyeke televîzyonê bû û derbarê serdana Ozgur Ozel a Şamê axivî.
Burhanettîn Bulut ragihand ku bi rêveberiya Şamê re pêwendî kirine û ji bo serdana Şamê bersiveke erênî wergirtine.
Bulut pirsgirêka koçberên Sûriyeyî ya li Tirkiyeyê û Gora Silêman Şah a di bin serweriya Tirkiyeyê de bi bîr anî û got:
“Ozgur Ozel dê ji bo çareserkirina pirsgirêkan biçe Sûriyê.
Ji bo çareserkirina van pirsgirêkan bersiva me dan. Ji îro û pê de tenê dê asayîbûna şertan û cih û dema hevdîtinê bê axavtin.
Me daxwaza hevdîtinê kir û Şamê jî qebûl kir.”
Ozgur Ozel jî berî du hefteyan ragihand, dê meha Tîmehê biçe Sûriyeyê û bi Beşar Esed re bicive.
Ozel gotibû ku ew amade ye navbeynkariyê di navbera Serokkomarê Tirkiyeyê Recep Tayyîp Erdogan û Serokê Sûriyeyê Beşar Esed de bike.
Bakirhan ji Ozel re gotibû: Gelo tu hewl didî siyaseta dijîkurd birêxistin bikî?
Hevserokê Giştî yê DEM Partiyê Tuncer Bakirhan jî duh armanca serdana Serokê CHPyê ya Sûriyeyê rexne kir û got, “Gelo tu hewl didî siyaseta dijîkurd birêxistin bikî?”
Bakirhan got:
“Me ya deshilatê fam kir lê niha jî serokê mixalefê di vê mijarê de ketiye nava hewldanan.
Beriya çend rojan birêz Ozgur Ozel dibêje, ‘Ji bo ku hevdîtin di navbera Erdogan û Esed de çêbibin ez dikarim navbeynkariyê bikim’.
Ez jî li vir li pêşiya hemû raya giştî dixwazim bibêjim, birêz Ozel, Erdogan û Esed dixwazin li ser dijayetiya Kurdan hevdîtinan bikin û li hev bikin.
Gelo hûn hewl didin vê siyaseta dijkurd birêxistin bikin? Sûdeke wê ji bo we û me û hemû gelên Tirkiyê tineye.
Tişta divê hûn bikin ew e ku polîtîkaya Rojava-Sûriyê di ber çavan re derbas bikin.
Ma ji we re maye hûn navbeynkariyê bikin da ku du dijberên Kurdan yên ku dixwazin li ser dijminatiya Kurdan bên cem hev?”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse