Beşar Esed li Şamê bi Serokê Lubnanê yê berê re civiya

Hewlêr (Rûdaw) - Serokê Sûriyê Beşar Esed li Şamê pêşwaziya Serokê Libnanê yê berê Mîşêl Un (Michel Aoun) kir û got, ku aramiya li Lubnanê bandoreke erênî li Sûriyê û navçeyê jî dike.

Beşar Esed behsa rola Mîşêl Un di parastina peywendiyên di navbera Sûriyê û Lubnanê de kir û tekezî li ser pêşxistina peywendiyên navbera herdu welatan kir.

Esed herwiha da zanîn ku Lubnanî dikarin pirsgirêkên xwe çareser bikin. Esed wiha got: “Baweriya me bi hêza gelê Lubnanê heye ji bo derbaskirina hemû pirsgirêk û kêşeyan û bihêzkirin û bicihkirina rola saziyên xwe yên netewî û yasayî.”

Serokê Sûriyê eşkere kir ku doza Sûriyê û Lubnanê girêdayî hev in û başbûna peywendiyên Sûriyê bi welatên Ereb re dê bandoreke erênî li Sûriyê û Lubnanê bike.

Di hevdîtinê de, Mîşêl Un jî got, Sûriyê demên gelek xerab derbas kirin û destnîşan kir, ew li pişt Sûriyê ne û dixwazin peywendiyên Şamê û welatên Ereb baştir bibin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger