Hewlêr (Rûdaw) - Serokê Herêma Kurdistanê û Serokkomarê Fransayê bi rêya telefonê hevdîtinek pêk anî û li ser pêwendiyên Îraq û Herêma Kurdistanê, pêşhatên li Sûriye û Rojavayê Kurdistanê gotûbêj kirin.
Hevdîtina Serokê Herêma Kurdistanê Nêçîrvan Barzanî û Serokkomarê Fransayê Emmanuel Macron şeva borî bi rêya telefonê pêk hat.
Serokatiya Herêma Kurdistanê li ser hevdîtinê daxuyaniyek belav kir.
Serokatiya Herêma Kurdistanê got:
“Her du aliyan girîngiya hewlên ji bo parastina aramî û îstiqrara li herêmê dubare kir.
Her wiha berdewamiya diyaloga Herêma Kurdistanê ya li gel Hikûmeta Federal a Îraqê ya ji bo çareserkirina pirsgirêkên di navbera Hewlêr û Bexdayê de ji bo aramiya Îraqê wekî tiştekî girîng nirxandin.”
"Serok Nêçîrvan Barzanî spas kir"
Serokatiya Herêma Kurdistanê ragihand:
“Serok Nêçîrvan Barzanî ji bo piştgirî û rola dostane ya Fransa û Serok Macron a di alîkariya Îraq û Herêma Kurdistanê de bi taybetî di rojên zehmet de spasî û pêzanîna Herêma Kurdistanê dubare kir.
Her wiha wî amaje pê kir ku gelê Kurdistanê ti carî alîkariyên Fransayê ji bîr nake.”
Li gorî daxuyaniya Serokatiya Herêma Kurdistanê:
“Serok Macron jî dubare kir ku Fransa dê berdewam piştgiriya Îraq û Herêma Kurdistanê bike û got ku Fransa bi girîngiyeke mezin li pêwendiyên xwe yên bi Îraq û Herêma Kurdistanê dinêre.
Her wiha wî pesnê hewlên Serok Nêçîrvan Barzanî yên ji bo aramî û çareserkirina pirsgirêkan da.”
Her wiha di hevdîtina telefonî de:
“Serok Macron serkeftina hilbijartinên Parlamentoya Kurdistanê li Serok Nêçîrvan Barzanî pîroz kir û her du alî li ser hewlên pêkanîna kabîneya nû ya Hikûmeta Herêma Kurdistanê axivîn.
Her du alî li ser giringiya parastina mafên pêkhateyan li Îraq û Sûriyeyê hevbîr bûn û li ser parastina mafên Kurdan li Sûriyeyê tekez kirin û çend mijarên din ên girîng nirxandin.”
