Hewlêr (Rûdaw) - Li parêzgeha Rihayê ya Bakurê Kurdistanê di van demên dawî firotina îsotan kêm bûye.
Li Rihayê îsota hişk û dimsa îsotê baharat û xwarinên serekî yên her sifreyê ne.
Lê belê esnafên li bazara îsotan a Rihayê îsal ji kêmbûna firotinê gilî û gazinan dikin.
Dikandar diyar dikin ku piraniya mişteriyên wan geştyar in.
"Bazara me ji nîvî zêdetir kêm bûye"
Dikandar Yusuf Kiliç got, "Niha ji ber aboriya Tirkiyeyê kirîn û firotin kêm bûye. Li gorî demên berê bazara me ji nîvî jî zêdetir kêm bûye."
Dikandar dibêjin li bazarê hinek îsota hişk û dimsa îsotê ya sexte bi erzanî tên firotin.
Ji ber vê yekê dikandar hişyariyê didin û dibêjin divê kiriyar agahdar bin û îsot û dimsa îsotê yên li ber tavê nehatine hişkirin nekirin.
"Corên îsotan gelek in lê em yên destan pêşniyar dikin"
Dikandar Kemal Catin wiha anî ziman, "Niha bazar hinekî rawestiyaye. 2-3 meh in sekiniye lê li tevahiya Tirkiyeyê bazar sekiniye.
Corên me yên îsotan gelek in, ên kargehan hene û yên bidestçêkirî hene. Corên îsotan gelek in lê em yê destan pêşniyar dikin."
Îsot berhemeke serekî ya çandiniya Rihayê ye û li vî bajarî bi rêjeyeke zêde îsot û dimsa îsotê tê bikaranîn.
Li gorî amarên Yekîtiya Hinardekarên Başûrêrojhilatê Anadoluyê ku hinek bajarên Bakurê Kurdistanê li xwe digire, sala 2024an ji 101 welatan re bi bihayê 13 milyon û 940 hezar dolaran îsota hişk hatiye hinartin.
