Hewlêr (Rûdaw) - Hevserokê Giştî yê DEM Partiyê Tuncer Bakirhan diyar kir ku pêvajoya çareseriyê li Tirkiye û Bakurê Kurdistanê bi serkeve dê bandorê li Sûriyeyê jî bike.
Bakirhan got, “Em karekî zehmet dikin, înkarparêzî û tekparêzî bi rûniştina li ser maseyê û bi meşandina diyalog û muzakereyeke kurt ji bi dawî nabe.”
Hevserokê Giştî yê Partiya Gelan a Wekhevî û Demokrasiyê(DEM Partî) Tuncer Bakirhan, li Silêmaniyê tevlî "Konferansa Hevpeymanên Sosyal Demokrat ên Welatên Ereban" bû û panelekê de de axivî.
Bakirhan kêfxweşiya xwe anî zimên ku li Silêmaniyê, bajarê Şêx Mehmûdê Berzencî û Mam Celal Talebanî, beşdarî konferansê bûye.
Wî got ku axaftina li ser aştî û çareseriyê li vî bajarê helbestvanên wekî Pîremêrd, Şêrko Bêkes û Mehmet Emîn Zekî wateyeke taybet dide mijarê.
"Rejîmên sed salî aştî neanîn Rojhilata Navîn"
Bakirhan diyar kir ku sed sal berê Rojhilata Navîn li ser maseyê hat parçekirin û rejîmên tekparêz, mezhebperest û nijadperest hatin avakirin.
Wî anî zimên ku van rejîman aştî û demokrasî neaniye herêmê.
Wî da zanîn ku ev sed sal e gel û baweriyên cuda li Rojhilata Navîn tên çewisandin û tune tên hesibandin, lê tekez kir ku ev polîtîkayên înkarê piştî 100 salan têk çûne.
Pêvajoya çareseriyê û rola Abdullah Ocalan
Hevserokê Giştî yê DEM Partiyê amaje bi pêvajoya çareseriyê jî kir û got, "Bi banga Birêz Abdullah Ocalan, têkoşîna çekdarî ya nêzîkî 50 salan bi dawî dibe û PKKyê xwe fesix kir.
Bi vî awayî, Birêz Ocalan deriyek vekir da ku Tirkiye bigihîje demokrasiyê û da ku hemû gel bawer bike ku bibe bwelatiyên wekhev."
Bakirhan eşkere kir ku wan wekî DEM Partiyê di vî deriyê vekirî de têdikoşin da ku Tirkiye bi Kurdan re li hev were, komareke demokratîk ava bibe û polîtîkayên înkarê bi dawî bibe.
Wî bal kişand ser bedelên mezin ên ku ji bo vê yekê hatine dayîn.
Tuncer Bakirhan destnîşan kir ku bi hezaran siyasetmedarên Kurd girtî ne û daxwaza wan a hevpar ew e ku Kurd bi ziman û nasnameya xwe di sîstemeke wekhev de bijîn.
"Heke li Tirkiyeyê bi ser bikeve, dibe ku aştiya Kobanî û Şamê jî pêk were"
Hevserokê Giştî yê DEM Partiyê anî zimên ku heke ev pêvajo bi ser bikeve, dê polîtîkayên înkarparêz û antîdemokratîk bi dawî bibin, girtî dê azad bibin û Tirkiye dê nasname û baweriyên cuda nas bike.
Wî da zanîn ku "paradîgmaya Ocalan ji bo çareserkirina şerê li Rojhilata Navîn jî pêşniyarên girîng dihewîne" û diyar kir ku pêvajoya li Tirkiyeyê dikare bandoreke erênî li Sûriyeyê jî bike.
Bakirhan di berdewamiyê jî de got, “Heke ev zemîn li Tirkiyeyê bi ser bikeve, dibe ku aştiya di navbera Şam û Kobanî û Qamişloyê jî pêk were.”
Siyasetmedarê Kurd her wiha anî zimên ku eger li Tirkiyeyê modelek aştiyê çêbibe, ev dikare ji bo çareserkirina şerê Filistîn û Îsraîlê jî bibe mînak.
"Em karekî zehmet dikin lê em bi hêvî ne"
Tuncer Bakirhan got ku pêvajoya aştiyê hîn di destpêkê de ye û wiha got,"Birêz Ocalan ji Îmraliyê bang kir û li parlamentoyê komîsyonek hat avakirin. Ew komîsyon hîn bi mexdûran re dicive.
Eger em karibin vê pêvajoyê bimeşînin, dê zemîna yasayan jî çêbibe."
Banga hevgirtina gelan û rexne
Hevserokê Giştî yê DEM Partiyê bal kişand ser hevgirtinê û tekez kir ku eger hemû gelên bindest piştgiriyê bidin hev, dê rejîmên tekparêz neçar bimînin ku werin ser maseya çareseriyê.
Di axaftina xwe de, wî rexneyek jî kir û anî zimên ku di panlekê de nûnerekî Filistînî di axaftina xwe de qet behsa Kurdan nekiriye.
Bakirhan got, "Em dibêjin Filistînî birayên me ne û Kurdan ji bo wan canê xwe daye.
Kengî Filistînî piştgiriyê bidin aştiya Kurdan û Kurd piştgiriyê bidin aştiya Filistîniyan, wê demê ev desthilatdariyên zalim neçar dimînin ku biguherin."
Hevserokê Giştî yê DEM Partiyê di dawiyê de eşkere kir ku ew bi hevgirtin û têkoşîna hevbeş, dikarin aştî, azadê û demokrasiyê bînin Rojhilata Navîn.
