Wêneyekî temsîlî / Arşîv
Hewlêr (Rûdaw) - Li Bakurê Kurdistanê bikaranîna madeyên hişbir roj bi roj zêdetir dibe û malbat bê çare ne.
Huseyîn Yilmazoglu li navçeya Sirûcê ya parêzgeha Rihayê ji bo du zarokên xwe dest bi çalakiyê rûniştinê kiriye.
Kurên wî yên 19 û 21 salî tûşî madeyên hişbir bûne û niha yek li nexweşxaneyê tê dermankirin û yek jî di girtîgehê de ye.
Huseyîn Yilmazoglu dîmenên zarokên xwe ji Rûdawê re şandin û dixwaze zarokên wî ji vê belayê bên rizgarkirin.
“Divê dibistan li ser tevgerên zarokan raweste”
Derûnnas û mamoste Abdulkadîr Gok da zanîn ku divê li dibistanan bi berdewamî çavdêriya zarokan bê kirin û got:
“Divê dibistan li ser derûniya zarokan û tevgerên wan raweste.
Bi vî awayî eger zarok, xort an ciwanên ku ev tişt bi kar anîne hebin, divê saziyên pêwendîdar ji aliyê derûnnasî û psikîyatrî û tendirustiyê ve tedawiya wan bikin.”
Malbatên ku zarokên wan dikevin belaya madeyên hişbir ji her alî ve têk diçin û nizanin çi bikin.
Pispor dibêjin ji bo rêgiriyê, divê hevahengiya malbat, mamoste û saziyên hikumî xurt be.
“Gelek malbat bê çare mane”
Abdulkadîr Gok bal kişand ser bêçareriya malbatan û anî zimên:
“Gelek malbat di vî warî de bê çare mane.
Dema zarokên wan dikevin hembêza madeyên hişbir û çareserî jî nabe ew malbat ji her alî ve, ji aliyê civakî, derûnî, aborî, ewlehî û exlaqî ve xirab dibe.”
Li gorî Rapora Madeyên Hişbir a Rêveberiya Ewlehiya Giştî ya Tirkiyeyê ya sala 2023an, li Tirkiyê û Bakurê Kurdistanê ji ber madeyên hişbir 302 hezar û 911 kes tên dermankirin.
Piraniya wan li dibistanan dest bi bikaranîna madeyên hişbir dikin û ji sedî 52,6ê wan di navbera 25 û 34 salî de ne.
Herwiha sala 2022yan 246 hezar û 237 hezar bûyerên madeyên hişbir rû daye û 114 hezar û 924 tawanbarên madeyên hişbir di girtîgehan de ne ku dike ji sedî 35,4ê temamê girtiyan.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse