AMED - Dadgehê qedexeya li ser bibîranîna Şêx Seîd betal kir

Hewlêr (Rûdaw) - Dadgeha 4emîn Îdarî ya Amedê, qedexeya parêzgariyê ya li ser bibîranîna Rêberê Kurd Şêx Seîd betal kir.

Li gorî nûçeya MAyê, qedexeya Walîtiya Amedê ya li ser bibîranîna Şêx Seîd hat rakirin ku dê ji aliyê Komeleya Çand û Piştgiriya Perwerdeyê ya Şêx Seîd bijata lidarxistin.

Bernameya bîranînê ya bi navê "Şeva bibîranîna lehengên serhildana 1925ân" ku dihat plankirin 13ê Sibatê li Navenda Çand û Kongreyê ya Çand Amedê bê lidarxistin.

Lê ew bername ji aliyê parêzgariya Amedê ve bi îdia ku “nîşaneyên cidî hene ku pergala cemaweriyê û ewlehiya cemaweriyê dê bi awayekî bê sekinandin an jî rawestandina jiyana asayî dê xera bibe” biryara hatibû qedexekirin.

Parêzgariyê bi hinceta “Qanûna Civîn û Xwepêşandanan a bi Hejmara 2911” û “Qanûna Îdareya Bajar a bi Hejmara 5442” bibîranîn qedexe kir.

 Parêzer Mehdî Ozdemîr heman rojê li dijî qedexeyê daxwazname da dadgeha îdarî.

Di daxwaznameyê de wiha hat gotin:

“Ev biryar li dijî Peymana Mafên Mirovan a Ewropayê (DMME) û destûra bingehîn e.

Mafê lidarxistina civîn û xwepêşandanan dikare bi qanûnan were sînordarkirin, ti bingehên hiqûqî yên şênber ên biryara qedexekirinê nîne û ev biryar ji aliyê armanca xwe ve ne hiqûqî ye.” 

Biryar hat betalkirin

Dadgeha 4emîn a Îdarî ya Amedê biryara qedexeyê betal kir.

Dadgehê di biryara xwe de diyar kir ku di civîna plankirî de agahiyên îstixbaratî yên ku nîşan didin wê çalakiyên 'provokatîf' an jî 'dijqanûnî' hebin, nîne.

Di biryarê de bal hat kişandin ku hinceta çalakiya îdarî nikare bi awayekî şênber bê avakirin û bal kişand ser vî awayî ku li gorî benda qanûnê ya pêwendîdar ji bo pêkanîna biryara qedexekirinê divê şert û mercên mîna ewlehiya neteweyî, rêkûpêkiya giştî, pêşîlêgirtina sûc, parastina tenduristiya giştî û exlaqê yan jî maf û azadiya kesên din bên xwestin û nirxandinên xwe dispêre îhtîmalan, ji bo çalakiyan wek bingeh nehat girtin.

Dadgehê biryar da ku di vê rewşê de, ji ber ku xuya nake ku redkirina hevdîtina ku ji aliyê dozgeran ve tê plankirin were lidarxistin, ne ji bo rêkûpêkiya demokratîk a civakê pîvaneke pêwîst e, ne jî destûrê nade mudaxeleya herî kêm a li mafên bingehîn û xizmetê ji berjewendiya gel re nake, hat destnîşankirin ku çalakiya îdarî ya mijara gotinê ne li gorî qanûnan e.