Ranya (Rûdaw) – Li bajarokên Pişder û Bitwên a navçeyên Ranya û Qeladizê, ku dikeve başûrê rojhilatê Çiyayê Qendîlê, erdhejek rû da û di encamê de hinek xani derizîn.
Derbarê vê yekê de Qayimiqamê Ranyayê Hîwa Qerenî ji Rûdawê re got: “Demjimêr 08.35ê îro danê sibê 15-8-2017, li bajarokên Pişder û Bitwên erdhej çêbû. Erdhejeke bi hêz bûye û li gund û navçeyên derdorê jî hest pê hatiye kirin. Lê ti zainayeke canî û madî nebûye.
Hîwa Qerenî diyar kir, ku wan pêwendî bi Rêveberiya Keşnasî û Erdhejzanînê ya Raperînê kirine lê heta niha jî hêza erdhejê nehatiye zelalkirin.
Qaymiqamê Ranyayê da zanîn, tîmên wan ên berevaniya şaristaniyê, polîs û asayîş ji bo her egerekî amade ne.
Ji aliyê din ve Rêxistina Jeofîzîk a Zanîngeha Tehranê ragihand, ku erdheja li Qeladizê di dijwariya 3.8 pileyên rîxterê bûye.
Rêveberê Giştî yê Keşnasî û Erdhejzanînê yê Herêma Kurdistanê Fazil Îbrahîm jî ji Rûdawê re tekez kir, ku hêza erdhejê 3.8 pile bûye.
Îbrahîm got: “Herêma Kurdistanê ne li ser rîfa erdhejan e, lewma ev hejîn ji ber bandora erdhejên li Îran û derdorê ne.”
.jpg&w=3840&q=75)