Hewlêr (Rûdaw) - Her du partiyên sereke yên Herêma Kurdistanê, Partiya Demokrat a Kurdistanê (PDK) û Yekîtiya Niştimanî ya Kurdistanê (YNK), ji bo çareserkirina krîza mûçeyan a li herêmê biryar da ku bi hev re tevbigerin.
Piştî lûtkeya bilind a ku li Pîrmamê bi serokatiya Serok Mesûd Barzanî û Serokê YNKyê Bafil Talebanî hat lidarxistin, di daxuyaniya hevpar de wiha hat gotin:
“Li ser wê yekê lihevhat çêbû ku hemû hewl ji bo çareserkirina pirsgirêkan û dabînkirina mûçe û mafên darayî yên Herêma Kurdistanê bên zêdekirin.”
Endamên polîtburoyên PDK û YNKyê bi temamî beşdarî civîna krîtîk a îro bûn.
Mijara sereke ya rojeva civînê, mûçeyên fermanberan ên ku ji ber nakokiyên li gel hikûmeta federal a li Bexdayê demeke dirêj e rastî astengiyan tên û mafên darayî yên Herêma Kurdistanê bû.
Tekezî li ser destûrê hat kirin
Di daxuyaniyê de hat diyarkirin ku aliyên siyasî, aborî û civakî bi awayekî berfireh hatine gotûbêjkirin û tekezî li ser wê yekê hat kirin ku gavên ji bo çareserkirina pirsgirêka mûçeyê dê “di çarçoveya destûrê de û bi hevahengiya tam a her du aliyan” bên avêtin.
Li gorî daxuyaniyê herwiha mijara bihêzkirina pêwendiyên di navbera her du partiyan de jî derket pêş.
Di daxuyaniyê de hat gotin, “Ji bo derbaskirina astengî û zehmetiyan û bi armanca parastina statu û destkeftiyên Herêma Kurdistanê, dê girîngiyeke taybet ji bo xurtkirina zêdetir a pêwendiyên di navbera PDK û YNKê de bê dayîn.”
Banga yekîtiyê
PDK û YNK ne tenê di navbera xwe de her wiha bangî hemû aliyên siyasî yên li Kurdistan û Îraqê jî kir ku piştgiriyê bidin çareseriya krîza mûçeyan.
Di lûtkeyê de her du aliyan bal kişan ser girîngiya wê yekê ku hemû alî helwesteke hevpar nîşan bidin û beşdarî çareseriya krîzê bibin.
Li gel Serok Mesûd Barzanî û Bafil Talebanî, Serokê Herêma Kurdistanê Nêçîrvan Barzanî, Serokwezîr Mesrûr Barzanî û Alîkarê Serokwezîr Qubad Talebanî jî beşdarî civînê bûn.
