Hewlêr (Rûdaw) – Piştî ku Wezareta Karên Navxwe ya Tirkiyeyê qeyûm danî ser Şaredariya Colemêrgê, Mem Ararat got, “Mala minê demokrasî, nîv kîlo demokrasî.”
Wezareta Karên Navxwe ya Tirkiyeyê bi daxuyaniyeke nivîskî ragihand ku wan qeyûm daniye ser Şaredariya Colemêrgê.
"Nîv kîlo demokrasî"
Hunermendê Kurd ê navdar Mem Ararat bi rêya hesabê xwe yê Xê bertek nîşanî vê biryarê da û got:
“Demokrasîya hilbijartina badilhewa
Demokrasîya tirşika li ber birincê
Mala minê demokrasî
Merheba demokrasî
Nîv kîlo demokrasî…”
Çi bûbû?
Polîsan doh bi şev Şaredariya Colemêrgê dorpêç kir, serê sibehê jî bi ser şaredariyê de girt.
Hevşaredarê Colemêrgê Mehmet Siddik Akiş jî li Wanê hat desteserkirin.
Piştî van rûdanan Parêzgariya Colemêrgê hemû çalakî qedexe kirin û dê qedexe 10 rojan biajo.
Wezareta Karên Navxwe ya Tirkiyeyê piştî van rûdanan ragihand ku wan qeyûm daniye ser Şaredariya Colemêrgê.
Li gorî daxuyaniyê, Mehmet Siddik Akiş ji erkê xwe hatiye dûrxistin û Parêzgarê Colemêrgê Alî Çelîk wekî qeyûmê Colemêrgê hatiye erkdarkirin.
