Hewlêr (Rûdaw) - Parêzgeha Dîlokê ya Bakurê Kurdistanê ku bi cihên xwe yên dîrokî û xwarinên xwe derdikeve pêş di betlaneya cejnê de hatina geştyaran rûyê esnafan geş kiriye.
Hejmareke zêde ya geşyaran ji bo derbaskirina betlaneya cejnê berê xwe daye.
Birêvebira Kompanyaya Geştyariyê Gul Erê got:
"Her gava ku ez têm, bi hezkirin û kelecaneke mezin digerim.
Em vê cejnê jî bi komeke 50 kesî re hatin. Em gelekî kêfxweş dibin.”
Geştyar Keleha Dîlokê, muzexaneyan, bazarên çandî û qehwexaneya dîrokî ya Tahmîsê ziyaret dikin.
"Gelek cihên xweş hene ku divê werin dîtin"
Geştyar Neşe Koçanalî xweşiya Dîlokê wiha anî ziman:
"Gelek cihên xweş hene ku divê werin dîtin. Bajarekî çandê ye, dîrokeke kevin a bajêr heye."
Xwediyên dikanan jî di van rojan de ji rojên din zêdetir dikanên xwe vedikin û dibêjin, ew dixwazin pêdiviyên geştyaran peyda bikin û dahateke baştir bi dest bixin.
"Em bi awayekî herî baş pêşwaziya mêvanên xwe dikin"
Birêvebirê Qehwexaneya Dîrokî ya Tahmîsê Selîm Bagci wiha got:
"Em bi awayekî herî baş pêşwaziya mêvanên xwe yên ji 81 parêzgehan hatine dikin.
Niha roja sêyem a cejnê ye û kolanên bajêr qelebalix in."
Dîlok, bi cihên xwe yên dîrokî û cureyên xwarinên xwe, yek ji bajarên pêşeng ên geştyarî yên Tirkiye û Bakurê Kurdistanê ye.
Li gorî amaran, sala borî nêzîkî du milyonan geştyar çûne Dîlokê.
