Hewlêr (Rûdaw) - Birêvebirê Krîzan ê Parêzgeha Îlamê ragihand ku piştî hewldanên du rojan, şewata li daristanên devera Siyeçeliyê ya parêzgehê hat kontrolkirin.
Birêvebirê Birêvebiriya Krîzan a Parêzgeha Îlamê ya Rojhilatê Kurdistanê Elî Mihemed Pakdilnejad, ragihand ku şewata daristanên devera Siyeçeliyê ji aliyê tîmên Birêvebiriya Krîzan û xelkê herêmê ve hatiye vemirandin.
Elî Mihemed Pakdilnejad got, roja înê şewateke mezin li daristanên deverê derketibû û beriya nîvroya roja Şemiyê hatibû vemirandin lê êvara heman rojê ji ber bayê ji nû ve geş bû.
Piştî du rojan, bi beşdariya tîmên Birêvebiriya Krîzan a parêzgehê û alîkariya xelkê herêmê, şewat bi temamî hat vemirandin.
Li gorî Rêveberê Krîzan ê Îlamê, ji ber bayê, dijwariya erdnîgariya herêmê û qada berfireh a daristan û pûş û pawanê, vemirandina şewatê dijwartir bû.
Elî Mihemed Pakdilnejad her wiha diyar kir ku 200 kes beşdarî vemirandina şewata li daristanên devera Siyeçeliyê bûne û du helîkopter jî ji bo veguhestina tîman û kelûpelên wan di kontrolkirina şewatê de hatine bikaranîn.
