Hewlêr (Rûdaw) - Şaredariya Reqayê bi alîkariya Rêveberiya Xweser dest bi nûjenkirin û qîrkirina cadeyên nav bajêr kiriye.
Şaredariya Gel a Reqayê bi hevkariya Rêveberiya Xweser cade û taxên nav bajêr nûjen û qîr dike.
“Me dest bi nûjenkirinê kiriye”
Şêwirmendê Projeya Qîrkirina Rêyan EbdulHemîd el-Ilês li ser xebatên li Reqayê got:
"Me îro dest bi nûjenkirina Cadeya Taxa Hessûn kiriye, ji Mizgefta Umer Bin Xetab a li rojava dest pê dike heta digihe Cadeya Mensûr a li rojhilat.
Piştî xweşkirin û rastkirina cadeyê, dê madeya zîroyê bê rijandin û bê şosekirin da ku dawiyê bê qîrkirin.”
EbdulHemîd el-Ilês diyar kir ku tîmên şaredariyê cade, rê û kolanên nav bajêr jî paqij dikin.
Divê were gotin ku berê taxên li rojhilatê Reqayê hatibûn paqijkirin û nûjenkirin.
EbdulHemîd el-Ilês diyar kir ku xebatên qîrkirinê berdewam dikin û got:
"Tîmên me vê sibehê dest bi qîrkirina rêyan kiriye, ji dibistana Ednan Malikî dest pê dike û piştre hemû rêyên derdorê dide ber xwe.
Di heman demê de tîmên me cadeya ku ji Kornîşa Sûrê dest pê dike û digihe Cadeya Umer Bin Xetab û Bazara Halê qîr dikin.
Piştre dê dest bi nûjenkirina rêyên ku diçin Girê Spî, Wadî û bazarê bikin."
Li gor plana Şaredariya Gel a Reqayê dê 38 cadeyên sereke û kolan bên nûjenkirin.
