Îro di seatên sibehê de, monumenta şehîdên 1ê Sibatê li parka Samî Ebdulrehman a Hewlêrê, merasîmek bi boneya salvegera teqînên 1ê Sibata 2004an ên li baregehên PDK û YNKê birêve çû.

Di wê merasîma bîranîna qurbaniyên 1ê Sibatê de, Mesrûr Barzanî, Serokwezîrê Hikûmeta Herêma Kurdistanê, tacegulek li ser monumentê danî.

Seroka Parlamentoya Kurdistanê, peyamek bi boneya salvegera teqînên 1ê Sibatê belav kir.

Rêwaz Fayeq, Seroka Parlamentoya Kurdistanê, di peyama xwe de ragihand, vî karê li dijî mirovahiyê bo hemû cîhanê selmand ku ew ji tarîkistanê hatin û li dijî jiyandostî û aramiyê ne.

Seroka Parlamentoya Kurdistanê, herwiha di peyama xwe de behsa gef û metirsiyan kir û ragihand, “Em bi pêwîstî dizanin wê rastiyê dûpat bikin ku gef û metirsiyên zêde li ser destkevtên siyasî û mafê me yên destûrî hene û berjewendiyên giştî yên me ji me dixwazin ku her tim yekrêziya di navbera aliyên siyasî yên Kurdistanê biparêzin û kûrtir bikin.”

Seroka Parlamentoya Kurdistanê dibêje, “16 sal berî niha, îro, roja 1ê Sibata 2004an, di karesatekî diltezîn û xwînavî de, bi planekî destê tarî yê terorîstan, gelê me û xelkê xweragir ê bajarê Hewlêrê, li nav herdu melbendên 3 ya YNKê û liqa 2 ya PDKê, rûbirûyê du êrişên terorîstî yên xwekujî bûn.”

Di peyama xwe de Rêwaz Fayeq, amaje bi roja encamdana wan êrişan ku di yekem roja cejna Qurbanê de hatin kirin û şehîdbûna bi dehan kesan kiriye di wan êrişan de û ragihandiye, “Vî karê li dijî mirovahiyê bo hemû cîhanê selmandiye ku ew ji tarîkistanê hatin û li dijî jiyandostî û aramiyê ne, lêbelê xweşbextane bi saya yekrêzî û lixweborîna gelê me û tebaya di navbera hêz û aliyên siyasî û hemû pêkhateyên xelkê Kurdistanê roj bi roj qewareya Herêma Kurdistanê cîgirtir û bihêztir bûye.”

Nêçîrvan Barzanî: Şehîdên 1ê Sibatê her tim di wijdana gelê Kurdistanê de zindî dimînin

Serokê Herêma Kurdistanê Nêçîrvan Barzanî, di salvegera teqînên 1ê Sibata 2004an li baregehên PDK û YNKê peyamek belav kir û ragihand, “Em bi rêz û hurmet şehîdên nemir ên 1ê Sibata 2004an bi bîr tînin ku li baregehên PDK û YNKê li Hewlêrê bûne qurbaniyên terorê.”

Serokê Herêma Kurdistanê dibêje, “Ew ê hertim di wijdana gelê Kurdistanê de zindî bimînin. Silav li malbatên wan ên serbilind, dirûd ji canê wan ê paqij re, bîranîna wan bi xêr.”

Em bi rêz û hurmet şehîdên nemir ên 1ê Sibata 2004an bi bîr tînin ku li baregehên PDK û YNKê li Hewlêrê bûne qurbaniyên terorê. Ewê hertim di wijdana gelê Kurdistanê de zindî bimînin. Silav li malbatên wan ên serbilind, dirûd ji canê wan ê paqij re, bîranîna wan bi xêr.

— Nechirvan Barzani (@IKRPresident) January 31, 2020