Hewlêr (Rûdaw) - Seta Pirtûka Zimanê Şîrîn a fêrbûna zimanê Kurdî ku ji 2 pirtûkan pêk tê derket.
Tevî hemû astengî û zextan jî li Bakurê Kurdistanê xebatên li ser zimanê Kurdî jî roj bi roj bi pêş dikevin û pirtûk û kovarên nû tên belavkirin.
Komeleya Perwerde û Çandê ya Sîpanê ya li parêzgeha Wanê ya Bakurê Kurdistanê, asta pêşîn a Pirtûka Zimanê Şîrîn a fêrbûna zimanê Kurdî ku ji 2 pirtûkan pêk tê weşand.
Pirtûka Zimanê Şîrîn a ku ji aliyê nivîskar Nezîr Gumuş ve hatiye nivîsandin ji Weşanxaneya Nameyê derket.
Pirtûk ji sê astan pêk tê
Pirtûk bi sîstema hînkirina zimanên Ewropî, bi rengê 3 asatên cuda hatiye amadekirin.
Di asta pêşîn de 10 mijar hene û her pirtûk 176 rûpel e.
Rûpelên pirtûkê reng bi reng in û bi dizayneke balkêş, bi fêrkirineke hêsan, bi rêzimaneke rehet, bi metodeke pedegojik, bi mamik û helbestan û bi xaçepirs û gotinên pêşiyan hatiye amedekirin.
Firotina pirtûkê dest pê kiriye
Li ser malpera Pirtûka Kurdî dest bi firotina Pirtûka Zimanê Şîrîn hatiye kirin û kesên dixwazin dikarin bi rêya înternetê bi awayekî online bixwazin.
Serokê Komeleya Sîpanê Omer Şaybak derbarê pirtûka Zimanê Şîrîn de ji Rûdawê re got:
“Pirtûka 'Zimanê Şîrîn' ji bo perwerdeya zimanê Kurdî çavkanîyeke nû ye.
Em gelekî kêfxweş in ku me zêdebarîyeke wiha li gencîneya Kurdî kir.
Ev pirtûk ji alîyê Komeleya Perwerde û Çandê ya Sîpanê ve hatiye amadekirin.
Ev pirtûk wekî set di nav xwe de sê astan dihewîne, asta pêşîn, asta navîn û asta dawî.
Em hêvî dikin her kesê dixwaze Kurdî hîn bibe ji vê pirtûkê sûdê wergire û fêdeya wê bibîne.
Hêvî dikim xebatên wiha zêde bibin.”
