Hewlêr (Rûdaw) - Li parêzgeha Wanê ya Bakurê Kurdistanê, Akademiya Çanda Bajarî Pêşbirka 1emîn a Helbestan a Fêqiyê Teyran li dar dixe.
Akademiyê da zanîn ku armanca wan a sereke piştgirîdayîna wêjeya Kurdî û teşwîqkirina helbestvanan e.
Ji bo serketiyan xelatên curbicur hatine diyarkirin. Xelata yekem 10 hezar lîre, ya duyem 5 hezar lîre û ya sêyem jî 3 hezar lîre ye.
Her wiha dê li gel xelatan seteke pirtûkan jî wekî diyarî bê dayîn.
Li gorî daxuyaniyê, dema dawî ya serlêdanê 1ê Îlona 2025an e û encam dê 1ê Cotmeha 2025an werin eşkerekirin.
Beşdar dikarin helbestên xwe yên bi Kurdî (Kurmancî) bişînin ser navnîşana e-mailê ya kentka6565@gmail.com.
Mercên beşdarbûnê yên ku ji aliyê akademiyê ve hatine diyarkirin wiha ne:
Mercên beşdarbûnê
Pêşbirk ji bo hemû kesên ku bi Kurdî (Kurmancî) helbestan dinivîsin vekirî ye û her beşdar dikare tenê bi yek helbestê beşdar bibe.
Mijara helbestê serbest e. Divê helbest orîjînal bin û naverokên tundî, nefret û heqaretê tê de nebin.
Dirêjahiya helbestê divê di navbera 20 û 100 rêzan de be.
Helbest divê bi formata PDFê û bi agahiyên kesane (nav, paşnav, telefon, e-mail) di pelekê de werin şandin. Ji bo parastina bêalîbûna juriyê divê navê beşdaran li ser helbestê neyê nivîsandin.
Helbestên ku piştî 1ê Îlona 2025an werin şandin, dê neyên qebûlkirin.
Helbest dê ji aliyê juriyeke pispor ve li gorî pîvanên wekî orîjînalîte, bikaranîna ziman û bandora hestyarî bên nirxandin. Biryara juriyê dawî ye.
Mafê weşandinê: Akademiya Çanda Bajarî mafê weşandina helbestên serketî di weşanên xwe de diparêze, bi şertê ku navê helbestvanan were diyarkirin.
Organîzator mafê guhertina mercan an betalkirina pêşbirkê diparêzin.
Feqiyê Teyran kî ye?
Feqiyê Teyran sala 1590î ji dayik bûye û sala 1632yan de wefat kiriye, yek ji pêşengên helbesta klasîk a Kurdî û fîlozofekî girîng e ku bi berhema xwe ya “Zembîlfiroşê” tê naskirin.
Ew bi Elî Herîrî, Melayê Cizîrî, Mela Huseynê Bateyî û Ehmedê Xanî re yek ji damezrînerên kevneşopiya wêjeya Kurdî tê hesibandin.
Jiyana wî
Navê wî yê rastî Mîr Mihemed e û di sala 1590î de li gundê Miksê yê Colemêrgê ji dayik bûye.
Ew ji malbateke mîran bû lê dev ji derfetên malbata xwe berdaye û berê xwe daye zanist û wêjeyê.
Feqiyê Teyran perwerdeya xwe li medreseyên Bedlîsê û li Medreseya Sor a Cizîrê wergirtiye.
Ew wekî “Feqiyê Gerok” jî dihat naskirin çimkî li gelek deverên Kurdistanê geriyaye û çîrok û destanên gelêrî berhev kirine.
Gora wî li navçeya Miksê ya Wanê ye.
Hinek berhemên Feqiyê Teyran
- Şêxê Sen'an
- Zembîlfiroş
- Qewlê Hespê Reş
- Bersîsê Abid
- Ey Avê Av
- Qiseya Bersiyayî
- Xan Dimdim
